Марий Эл вуйлатыше Юрий Зайцев Москваште Россий Пӱртӱс поянлык да экологий министерствым вуйлатыше Александр Козлов дене вашлийын.
Вашлиймаште регионыштына йырым-йырысе средам аралыме, кумдык-влакым вияҥдыме нерген каҥашеныт. Юрий Зайцев ик эн ончыч ыштышашлык задаче семын федерал кӱкшытан «Марий чодра» национальный паркым оролымо дене кылдалтше йодышым тарватен. Ты пашаште республикысе экономикым вияҥдыме, кумдыкым оролымо да верысе калыкын шонымашыже коклаште баланс лийшаш. Санденак регион вуйлатыше Россий Пӱртӱс поянлык да экологий министерствылан оролымо кумдыкын правовой статусшым рашемдыше посна приказым лукташ кӱлмӧ нерген темлымашым ямдылаш ойым ыштен.
Тыгак вашлиймаште «Экологическое благополучие» у национальный проектым илышыш шыҥдарен толмо йодышым каҥашеныт. Россий президентын темлымыж дене илышыш пурышо проект почеш республикыштына чодырам уэмдыме, эҥер йогыным эрыктыме, гидротехнический сооружений-влакым уэмден олмыктымо, шӱкшакым утилизироватлыме, контейнер площадке-влакым тӱзатыме да моло паша шукталтыт. Мучашлан регион вуйлатышына министрлан республиклан тӱткышым ойырымылан тауштен.
Марий Эл вуйлатышын пресс-службыжын уверже негызеш Светлана Носова ямдылен
