30 тулык йоча У ий деч ончыч шке пачеран лийын. Лишыл жапыште нуно Советский районысо Ургаш посёлкыш илаш куснат.
Чыла пачерым вигак илаш пураш йӧршым ыштеныт, эсогыл газ плита ден сантехникым шынденыт. Пӧрт воктенысе кумдыкышто автомобиль ден йолешке корнылам оптеныт, йоча ден спорт площадке-шамычым келыштареныт. Пачер-влаклан чылаже 65,6 миллион теҥгем тӱленыт.
Пачер оза-влакым куанле событий дене Марий Эл правительстве председательын икымше алмаштышыже Наталья Ошланова саламлен.
«Регионлан тиде кугу событий. Марий Элым вуйлатыше Юрий Викторович Зайцев тулык йоча-влаклан илыме верым ситарыме йодышым эреак терген шога. Шке илыме вер – тиде йол ӱмбалне пеҥгыдын шогымо, шкем ӱшанлын кучымо да илышым сай условийыште вияҥдаш лийме символ», – палемден тудо.
Марий Элыште 2021-2024 ийлаште 949 тулык йочалан илыме верым ситарыме. Шушаш 2025 ийыште эше 191 еҥ у пачеран лиеш. Тидлан 572,6 миллион теҥгем ойырымо.
Марий Эл Республикым вуйлатышын пресс-службыжын уверже негызеш Маргарита ИВАНОВА ямдылен
