Фермер озанлыкыштына вольыкна шукемын. Лӱштымӧ ушкална тӱҥалтыште 10 вуй лийын гын, кызыт – 25 вуй. Тӱкан шолдыра вольыкна чумыржо 35 вуйыш погына. Кызыт презе-влак шочыт, сандене эшеат ешаралтеш. Ме тидым ончылгоч шотыш налынна – вӱтанам кугемденна, кормат ситышаш. Кызыт 30 гектар мландына уло. Комбайным кид гыч, а МТЗ-82 тракторым уым налынна. Ешыштынат ешартыш – визымше уныкана шочын. Икшывына-влак коктынжо шке ешышт дене посна илат, кумшыжо оласе агроколледжыште тунемеш. Нуно тургым годым эре толын полшат. Но кече еда шуктышаш сомылна ешаралтмылан кӧра ик пашаеҥым налме.
Шушаш ийыште вольыкым умбакыже ешараш, пасум кугемдаш шонена. Кызытсе марте 20 гектарыште пырчым, 10 гектарыште шудым куштенна. Но ончыкыжо тиде кумдык шагал лиеш – кормам утларак ямдылыман. Вет вольык вуйым ешарен толмо дене пырля лӱштышымат кугемдыман. Пашалан кӱлеш техникына уло, вийнат сита, шонем. Ӧрканыман гына огыл.
Ялысе калыкланат шушаш ийыште тидымак тыланем. Уке гын ялыштына вольык ий гыч ийыш шагалемеш. Вий шутымо годым тудын деч йӱкшыман огыл, ашныман. Шӧр-торык – ялыште илышылан сай шӱкалтыш. Пашалан кумылда лийже, тазалыкда ынже лушко!
А.Н.Лесников,
Учимсоласе фермер
