Мастерскойышко йолчиемым олмыкташ конденак шогат, сандене пашам уло. Еҥ-влаклан олмыктымем келша, ӧпкелыше уке. Сайын ышташ тыршем. Таклан огыл олмыктымо деч вара тауштен але мокталтен кодат. «Ик палыме дек коштна, но ыштымыже ыш келше», – маныт. Утларакше кызыт таган пундаш ден молний замокым вашталташ, рончалтше ургышым тӧрлаш йодыт. Портышкем пундашым тумышташат кондат, телым йӱштӧ вет. Посёлкышто ончыч вес мастерскоят ыле, кызыт мыйынак веле кодын.
Сандене шушаш ийыштат ӱшаныштым сулыде ок лий. Мый йолчиемым веле огыл олмыктем, сравочымат ыштем. Тиде сомылым шуктышат посёлкышто тетла уке. Йолчиемым ургашат, сравочым ышташат станоклам налынам. Паша шушаш ийыштат ситышын лиеш, шонем. Лач ӧрканыме ок кӱл.
Йолчиемдам аралыза, чот локтылалтмешке ида шукто, олмыкташ ондакрак кондыза, тунам тудо качествыжым ок йомдаре. А ме, олмыктышо-влак, тудым кертмына семын сайын тӧрлаш тыршена. Илышыштат тыгак шкендам аралыза, нелын черланымешке ида шукто, врач деке жапыштыже миен толза. Тидыже кызытсе илышыште поснак кӱлешан. У ийыште кумылда эреак нӧлтшӧ лийже, пашада ушнен толжо!
А.В.Гаврилов,
индивидуальный предприниматель
Ю.Исаков ямдылен
