«МАРИЙ ЭЛ» ТАЧЕ УВЕР ЙОГЫН

У ий салам: Кужэҥер

У ий салам: Кужэҥер

Колхозлаште бухгалтерлан ыштыме деч вара 1996 ийыште предприниматель пашаш ушнышым, а 2006 ийыште «Феникс» ООО-м почым. Кызыт Шӱдымарий, Руш Шой да Агытансола яллаште кум кевытем уло. Тынар ий ыштыме гыч мом ойлен кертам? Яллаште кевытым кучышылан кажне ийын нелырак веле лиеш. Район рӱдылаште супермаркетлам почмаш тидлан амалым пуыш. Срок эртыман сатум ужалат гынат, нуным огыт терге. А мемнан шотышто иктаж-кӧ вуйым шиеш гын, вигак тергаш кудал толыт. Эше коронавирус чаракым ыштыш. Но чытен лекме, черланыме огыл. Тений Шӱдымарий кевытыш газым пуртымо, паша условийым саемдыме – теве поро уверже.

Шушаш ийыште Руш Шой кевытыш газым пуртена. Кеч тыге торгайыме вернам шотыш кондена. Агытансолаште кызытеш тугак кодеш – тушто кевытшат кугу огыл, ялыште еҥжат шагал. Пашаеҥна сита – кычал толашыме ок кӱл, шке йодын толыт. А улшыжо мыланна ӧпкелен огыт керт.

У ий дене эн ончычак шкенан пашаеҥ-влакым саламлем да тыршен ыштымыштлан тауштем. Сату налше-влакланат таум ойлем. Мемнан деке кумылышт ынже йӱкшӧ. Ваш-ваш эҥертен гына ме кызытсе пагытыште илен кертына. Чылан таза да пиалан лийышт!

Л.К.САВЕЛЬЕВА,

«Феникс» ООО-н директоржо

Опубликовать в Одноклассники

Добавить комментарий