МАРИЙ ЙӰЛА

У ий пиал дене темже!

О, порын тӱҥ тӱҥалтышет дене волгалтын, кумылнам нӧлтен шого, Ош Сандалык Юмына!
Ужар шаган кожет дене, тичмаш кинде-шинчалет дене эртен кодшо идалыклан шулыкым, серлагышым, перкан илышым пуыметлан Марий калык лӱм дене вуйнам савена.
Сандалык Юмына, у идалыкым у пиалан илыш дене чапландарен шого.
О, порын у идалыкын аҥашкыже толын шогыза, Пӱрышына, Мер Кугу Юмына, Аралтыш-Серлагыш Юмына. Пӱрен шогыза мыланна толшаш идалыкыште поро пӱрымашым, иза-шольо, калык коклаште поро деч поро каҥашым. Шнуй Суксына-влак, арален шогыза кугу мардеж деч, кугу тул деч, кугу вӱд деч, йот кугыжанышын осал шинчаончалтышыж деч, еш кышкарыштат, калык коклаштат осал шомак кышкыме дечын.
Еш кышкарда тичмаш дене тӱланен шогыжо. Сурт-печыда уэмдалт, нӧлталт шогыжо, кинде-шинчалда ӱстембал тич пургыжалт шогыжо. Волык-кайыквусо илян дене ончышаш кумылда нӧлталт шогыжо, мӱкшотарда шем пыл гай ызген шогыжо, мӱй амбарда саска пуш дене ӱпшалт шогыжо.
У ий дене! У пиал дене! Эсен, таза лийза!
Марий Элын тӱҥ онаеҥже Александр Таныгин

Опубликовать в Одноклассники

Добавить комментарий