Марий Эл Кугыжаныш Погынышто Калык фронтын «Чылажат Сеҥымаш верч» гуманитарный миссийжын фотоончерже торжественно почылтын.
Фотоончер кум сериян: «Волонтёр-влакын пашашт», «Боец-влак дене пырля» да «Сарын корныж дене». Кажне снимкыште – документальный свидетельстве гына огыл, тиде фронтышто да тылыште айдемын илышыже ончыкталтеш..
Ончерым почмо годым Марий Элын Кугыжаныш Погынжын председательже Михаил Васютин палемден: «Кугу Отечественный сар жапысе семынак «Чылажат Сеҥымаш верч» лозунг тачысе илышлан келшен толеш. Тунамсе семынак республикыште илыше-влакым специальный военный операцийыште улшо боец-шамычлан полышым пуымо паша ушен шога». Михаил Васютин гуманитарный миссийыш надырым пыштыше да военнослужаший-влаклан полшышо депутат-шамычлан тауштен.
Кугыжаныш Погынын председательжын алмаштышыже, СВО-н ветеранже Александр Смирнов экспозийыште улшо фото-влак нерген ойлымыж годым тушто чыным ончыктымым палемден да каласен: «Кызыт мемнан депутат-влак Василий Арисов ден Борис Салдаев снимкысе гаяк условийыште улыт. Экспозицийыште чыным ончыктымо. Специальный военный операций кайыме кумдыкышто театр, завод-шамыч шаланен пытеныт, еҥ-влак илыме вер деч посна кодыныт, лишыл еҥыштым йомдареныт. Тачысе тыныс илышна – передовойышто улшо боецна-влакын кидыштышт. Нуно эрыкан элыште илаш правана верч кредалыт».
Ончерын организаторжо, Калык фронт регионысо исполкомжым вуйлатыше Валентин Севастьянов коллегыже-влаклан тауштен. Тыгак кугу таум СВО-н тӱҥалме жап гычак гуманитарный миссийыш кугу надырым пыштымыжлан Марий Эл Кугыжаныш Погынын депутатше, Калык фронтын штабшын еҥже Василий Бочкарёвлан каласен.
Марий Эл Кугыжаныш Погынын пресс-службыжын уверже негызеш Галина Кожевникова ямдылен.
Фотом Марий Эл Кугыжаныш Погынын пресс-службыж гыч налме.
