Калык пале почеш, телым кÿжгын вочшо лум сай кинде лектышлан негызым пышта. Тидыже тыге, да кызыт республикыштына веле огыл, Российыштыжат мландым куралын ÿдышö, шурным ончен куштышо озанлык пеш шагал. Ял калыкшат пакчасаскам ынде ешыжлан ситышым гына шында… Сандене кÿжгын вочшо лумлан куп, икса, памашшинча, ер ден эҥер-влак да чодыра гына куанат, очыни – шошым шулымыж годым вÿдшö дене иктыже вийым налеш, весыже пойдаралтеш, кумшыжо лöзаҥеш…
Кÿжгын вочшо лум шке пöртыштö илыше-влаклан пашам ешарен: кудывечым, корным эрыктыме деч посна эше оралте ÿмбак кÿзаш логалеш…
– Йöра, нимат огыл… Мыйын пурла вел леведышым изирак нöлталаш кÿлеш… А шола велыш кÿжгын вочшо лум нелытше дене тиде пашам шкеак олмешем ыштен, сандене мыланем ынде нимом тöрлаташ огеш кÿл, – оралте ÿмбак тÿрлö семын пÿтырналтын шичше лумым ончен ойла Волжский районысо Кÿшыл Азъял ялыште илыше Геннадий Константинов. (Ончычшо чыным ойла шонышым, сандене ак-мук лийын шогальым – мыскарам ышта улмаш!) – Леведыш гыч кержалтше тиде лумым лишыл кечылаште изин-изин кораҥдем, уке гын окнаш логалын кертеш.
Геннадий Васильевичын мутшо почеш, Азъял кундемыште тынар лум иктаж 25-30 ий лийын огыл! А эше февраль ден март мом ончыктат – иктат ок пале, южгунамже апрелят пöлекым ышташ моткоч кумылан.
Суртоза кудывечыш погынышо чыла лумым пöрт ончылнысо яра кумдыкыш эртыше арнян гына луктын кышкен, да теве угыч тиде пашамак ышта. «Молан кÿлеш? Шошо толешат, шке шула», – маншат улыт, очыни. Шошым вес паша – пöртйымал ден нöрепым лум вÿд пурымо деч эскераш кÿлеш.
– Канавым кеч ыште, кеч ит ыште – лум вÿд пöртйымаке садак кажне ийын пура, – кидшым лупшале суртоза. – Вÿдшорын куатше шошо дене чак кылдалтын. Южгунам лывыргын эрта, южгунам – чыла мушкын наҥгая, шонет…
Теве тыге… Лум уке – ик азап, лум шуко – вес азап… Айдемылан пÿртÿсын койышыжлан келыштаралташ гына кодеш.
М.ИВАНОВА
Авторын фотожо
