Советский поселко гыч Иван Таратинлан улыжат 27 ий. Туге гынат тудо специальный военный операцийын ветеранже.
Шуко ойлаш ок йӧрате
Тыгай самырыкланак илыш тӱҥалтышыштыжак моткоч шуко неле-йӧсым, йӱштӧ-шокшым чытен лекташыже логалын. СВО-што лиймыж жапыште ик гана веле огыл илымаш ден колымаш коклаште лияшыже пернен. Кузе ойлат тыгай годым, колымаш икмыняр гана шинчашкыжак ончен. Тидым ме, тыныс кава йымалне илыше-влак, Юмылан тау, огына пале. Санденак СВО-што лийше да кызыт тушто улшо-шамычлан мо гоч эрташышт логалме нерген сайынже каласкаленат огына мошто докан. Лач нунын мутышт гыч умылаш тыршена. А нине рвезе ден пӧръеҥ-влак ятырынже ойлаш пешыже огыт йӧрате.
Иван Таратинат тыгаяк. «Защитники Отечества» фондын регионысо филиалыштыже вашлиймеке, тӱҥалтыште шкеж нерген каласкалаш йодмекем, тудо моткоч кӱчыкын тыге ойлыш:
– Мый Советский поселкысо кокымшо номеран школым тунем пытаренам. Тылеч вара Юл кундем кугыжаныш технологий университетын радиотехнический факультетыштыже «радиоэлектронный системе ден комплекс-влак» специальность дене дипломым налынам. 2022 ийыште тунем пытаремеке, армийыш каенам.
Вес паша вер олмеш – повестке
Рвезе Ленинград областьыште Росгвардийыште отдельный связь батальонышто служитлен. Идалык гыч мӧҥгышкыжӧ пӧртылын да «Кристалл» заводыш инженер-конструкторлан пурен. Тушто ныл тылзе ыштымекше, паша верым вашталташ кумылжо лектын. Но шонымашыжым илышыш пуртен шуктен огыл. Молан манаш гын лач тиде жапыште специальный военный операций тӱҥалме нерген увертареныт. Тыге Иванлан 11 октябрьыште повескым кучыктеныт да 20 октябрьыште наҥгаеныт. Эн ончычак Ульяновскышто полигонышто лийын. Тушто тунеммашым эртен. Тылеч вара СВО-шко колтеныт.
– Мый Луганск Калык Республикыш Северский направленийыш военный действий кайыме зоныш логалынам. Ме Белогоровка кундемыште кредалынна. Тушто радиотелефонист лийынам. Икмыняр жап гыч тидын дене пырля эше рото командирын алмаштышыжын пашажым шуктенам.
Сусыргымаш
Иван Таратин 2024 ий 24 февраль марте кредалын. А тиде кечын миномет гыч лӱйкалыме жапыште сусырген: шодо турашкыже осколко пурен. Рвезым комиссоватленыт. 16 августышто тудым уволитлыме нерген приказым луктыныт. 18 августышто мӧҥгышкыжӧ толын шуын. А тымарте Иван госпитальлаште эмлалтын. Кеч пӧртылмекшат эмлалташыже логалын. Молан манаш гын тудын шӱмжӧ дене нелылык улмо рашемын. Тений январьыште рвезылан Йошкар-Олаште республиканский клинический больницыште операцийым ыштеныт – осколкым луктыныт.
Талешке-влак радамыште
Иван Таратин «Герои Марий Эл. Талешке-влак» программыш ушнен. Тиде – СВО участник-влаклан полшышо проект. Федерал кӱкшытан «Время героев» сынан программын шонымашыже тугаяк: нунылан ончыкыжым кугыжаныш да муниципал кучемлаште, регионысо кугу компанийлаште пашам ышташ йӧным пуаш.
– Тиде программыш ушнаш мылам «Защитники Отечества» фондын регионысо филиалжын Советский районышто кураторжо темлен. Мылам программе келшен, да кӧненам. Тиде – моткоч сай проект. Тушто пашам кузе виктараш кӱлмӧ шотышто шуко уым пален налынам. Программын тӱрыс иктешлымашыже июнь тӱҥалтыште лийшаш.
Ик заводыш пашаш пураш ямдылалтам. Кызытеш тушто тергымашым эртем да йыҥгыртымым вучем, – палдарыш ветеран.
Иван Таратин икмыняр наградым сулен. 2023 ийыште кеҥежым «За боевые отличия» медальым кучыктеныт. Тыгак IV степенян Георгиевский крест дене палемдалтын. Тудыжо эше толын шуын огыл.
– Награде тӱҥ огыл. Мый шке пашамым ыштенам, шындыме задачым шуктенам, – каласыш рвезе.
«Писынрак мондынем»
Мучаште куштылгырак йодышым пуышаш, шонышым, да ача-аваж дене кылым кучымо нерген йодым. Но тудо куштылгыжак огыл улмаш.
– Ачам-авам дене телефон дене йӧн лийме семын мутланенна. Но нунылан шукыж нерген каласкален омыл. Кызытат, специальный военный операций гыч пӧртылмеке, пешыже ом каласкале. Чыла палашышт нимолан, – лие вашмут.
Тылеч вара самырык пӧръеҥ мутланымашым мучашлаш тыршаш тӱҥале. Тудо ик жаплан шыпланыш, а вара тыгай ойым каалсыш:
– Мыйын велым ала торжан йоҥга гынат, лиеш, СВО дене кылдалтше йодышда-влаклан тетла ом вашеште? Тидын нерген кутырымем огеш шу. СВО нерген мый писынрак мондынем.
Тыге каласымыж деч вара, мутат уке, мутланымым чарнышна. Чынак, тыгай нерген кӧн шарнымыже шуэш? А кредалмаш нерген гын, ойлыманат огыл. Илышлан лӱдыкшӧ лийме, лӱйкалымаш, пудештарылмаш, вӱр йогымаш, колымаш. Тыгай шучко сӱретым, товатат, вашкерак мондымо шуэш.
Любовь Камалетдинова.
Авторын фотожо.
