8 июньышто Э.Сапаев лӱмеш опер да балет академический театрыште Социальный пашаеҥын кечыжлан пӧлеклалтше торжественный мероприятий эртен.
Республикнан социальный аланже нерген фильмым ончымо деч вара мутым Марий Элым вуйлатышын пашажым жаплан шуктышо Юрий Зайцев налын.
«Пашадам чын аклаш мутым кычальым да тудым лачшымак тиде видеороликыште ужым. Элнан президентше Владимир Владимирович Путин тидым шкем чаманыдыме паша манын. А кушто шкем чаманыдымаш, туштак – поро шӱм-чон, поро кумыл. Те чынжымак пеш сай пашам шуктеда», – палемден Ю.Зайцев.
Республикым вуйлатышын пашажым жаплан шуктышо Кугу Отечественный сарын участницыж ден тудын I группо инвалидностян эргыжым ончышо Т.Константинова нерген каласкален. Йоча годымак парализоватлалтше пӧръеҥ коштын кертдыме лийын. Татьяна Васильевна огыл гын, тудо аважын колымыж деч вара чылт шкетын кодын сеҥа улмаш.
«Татьяна Васильевна туге ыштен – неле да кочо илыш йыжыҥыш логалше пӧръеҥ кӱлешан да шкет огыл улмыжым шижын. Тиде историй айдемын поро шӱм-чонжым ончыктымо дене шергакан. Тиде пример дене мый тыланда тауштынем ыле, вет те тыгай подвигым кече еда ыштеда. Можыч чыла историйжак тыгай волгыдо огыл, но те чылан мемнан тӱткышнам суледа», – ешарен Ю.Зайцев, чылалан пеҥгыде тазалыкым, порылыкым, чытышым тыланен да социальный пашаеҥ-шамычлан награде-влакым кучыктен.
Граждан-влаклан социальный полышым организоватлымаште заслугыжлан да ятыр ий пашам сайын ыштымыжлан Оршанке районысо калыкым социально обслуживатлыме комплексный рӱдерын социальный пашаеҥже Валентина Долговалан «Марий Эл Республикысе калыкым социально аралымашын сулло пашаеҥже» чап лӱмым пуымо. Эше 14 еҥым Марий Эл Республикым вуйлатышын таумутшо дене палемдыме.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
