18 майыште «Тоштер-влакын йӱдышт» тӱнямбал акцийыш Марий Элат ушна. Тений тудо элыштына увертарыме Еш идалык дене кылдалтын да «Тукым гыч тукымыш. Еш реликвий-влак»темылан пӧлеклалтын.
Йошкар-Оласе тоштер-влак молгунамсе семынак поян программым ямдыленыт. Мутлан, Национальный художественный галерейыште ты кечын 10 гыч 16 шагат марте чыла проектым оксам тӱлыде ончен лекташ лиеш. Куд шагат кастене акцийым торжественно тӱҥалыт. Э.Сапаев лўмеш опер да балет кугыжаныш театрын солистше-влак тӱнямбалне чапланыше композиций-влакым йоҥгалтарат. Программым Йошкар-Олалан пӧлеклалтше музыкальный видеоинсталяций шуя.
Тений «Тоштер-влакын йўдышт» акцийыш Калык-влак келшымаш пӧртат ушна. Тушто 18 шагатат 30 минутышто «Пешком по Республике» проктын авторжо Александр Акилбаев дене вашлиймаш лиеш. «Колесо Дружбы» лӱман ончерыште Татарстанысе сӱретче-влакын пашашт дене палдарат.
Изобразительный искусство тоштер еш дене каныме программым ямдылен. Изижланат, кугужланат жапым пайдалын эртараш йӧн лиеш: аквагрим, пӧлек мастерской, ончер, фотозоно монь ышташ тӱҥалыт. Профессионал сӱретче-влак портретымат пӧлеклен кертыт.
Т.Евсеев лӱмеш тоштерыште акций 18 шагатат 45 минутышто концерт дене почылтеш. Вигак оласе усталык студий-шамыч шун гыч ненчаш, марий тӱрым тӱрлаш, пидаш, сӱретлаш туныктымо мастер-класс-влакым эртараш тӱҥалыт. Пӱртӱс, ял, калык йўла темылан модыш-влак, марий этнографий дене кылдалтше экскурсий, конкурс, викторине лийыт.
Кажне тоштерын акций кышкарыште эртарыме программыж дене нунын сайтыштышт палыме лияш йӧн уло. Икте раш: ты йӱдым мӧҥгыштӧ шинчыман огыл.
С.Носова
Фотом Тӱвыра, савыктыш да калык-влакын пашашт шотышто министерствын сайтше гыч налме.
