Марий Эл правительствын пунчалже почеш, 18 апрель гыч республикыште тул ваштареш кучедалме ойыртемалтше режимым пуртымо.
Правительствын тудым кораҥдыме нерген вес пунчалым лукмо марте ты режим вийыште лиеш. Чодыраште тул ылыж кертме IV-V классан лӱдыкшӧ лиеш гын, тыглай граждан-влаклан чодыраште лияш да транспорт дене пураш йӧршеш чаралтеш. Чодыра пашаште ыштыше, тыгак чодырам оролышо, аралыше, тергыше кугыжаныш должностной еҥ-влак гына тидым ыштен кертыт.
Чодыраште тул ылыж кертме IV-V классан лӱдыкшӧ лекме годым граждан-влаклан тулым ылыжташ, тудын ӱмбалан кочкаш шолташ, паяльный лампым, примусым, мангалым, тыгак пиротехникым кучылташ ок лий. Тидлан кӧра чодыраш пурымо корно-влакымат шлагбаум дене петырат.
Чаракым ыштыме пагытыште лесничестве чеклаште чодыраш транспорт дене пурен лектын кошташ кӱлмӧ шотышто йодыш лектеш гын, «Авиалесоохрана» чодырам аралыше авиаций базын диспетчер службышкыжо (8362)56-65-35 да республикын Пӱртӱс поянлык, экологий да йырым-йырысе средам аралыме шотышто министерствын (8362) 42-16-52 телефон номерышкышт йыҥгырташ лиеш.
Пунчалыште верлаште муниципал образований вуйлатыше-влакланат ты шотыштак икмыняр темлымашым ыштыме. Мутлан, нунын йырысе кундемым ылыж кертше тӱрлӧ тор, кукшо шудо, пушеҥге деч жапыштыже эрыкташ, минерализоватлыме полосам ышташ.
Пожарный лӱдыкшыдымылык правил ден йодмашым пудыртымылан титакан еҥ ден юридический лица-влакым мутым кучаш шогалтат.
Светлана Нсова
Снимкыште: Анастасия Соколован сӱретше.
Министерствын воткыл лаштыкше гыч налме.
