Тушко угыч кайыме шуэш
Крымыш миен толаш ятыр ий шоненам, но нигузе йӧн лектын огыл. А тений февральыште пиал шыргыжалын. Тыге Симферополь, Ялта, Севастополь олалаште лийынам. Ончыч самолет дене кум шагат чоҥештымеке, Крымыште лият ыле гын, кызыт тушко автомобиль але поезд дене веле логалаш лиеш. Тыге Йошкар-Ола гыч Симферополь марте кум кече кудалме. Пел отпускшым корнышто эртарышна.
Кӱвар йымалне корабль-шамыч, сухогруз ден контейнеровоз-влак ийын каят. Нуным катер ден буксир-влак оролат.
«Таврида» фирменный поезд дене Тамань кундем гыч Керчь олаш пурышна. Керчь гыч Джанкойыш, тушечын Симферопольыш, а Симферополь гыч Ялтыш автомашина дене кудалынна. Корно мучко виноград, тошто ден у санаторий-влак койын кодыныт.
Крымыш мийымына годым кечан игече ик арня наре шогыш. Эрдене мален кынелат – пычкемыш, кандаш шагатлан веле волгалтеш. Шым шагат кас марте уремыште эше волгыдо. Эрдене теҥыз воктене йолгорно дене куржталынна, индеш шагатлан йӱштылынна, вара веле эр кочкышым ыштенна. Кастене адакат бассейныш каенна, тушечын – мончашке.
Экскурсий дене Ливадий ден Воронцов полат-влакым, тӱрлӧ паркым, Ялтысе да Севастопольысо набережныйлам ончышна. Поснак илыме верна, Ласпи бухто, келшыш. Тудо Ялта ден Форос кундем коклаште верланен. Чоҥгаташте Ай-Петри курык коеш. Каласыман, курык кызытат нӧлталтеш, сандене тыште южгунам мланде чытырналтеш. Турций тышеч 260 километр тораште верланен. Ай-Петри курык касвел йӱштӧ мардежын пуалмыж деч авыра. Тушто лумжат уке. Тунам илыме кундемыштына южын температуржо 4, 10 градус леве лийын. А кечын шичме татше йомакысе гай. Кажне гана вес семын коеш. Мемнан илыме верыште кече Ялта ола вел гыч лектеш да Форосышто, Сарыч мысыште, курык ден теҥыз коклаште шинчеш. Могай гына пеледше кушкыл уке: магнолий, миндаль, роза! Южшо верысе пӱнчӧ таман. Тушко тидым ужмеке, тушко угыч мияш кумыл лектеш.
М.СКОБЕЛЕВ
Авторын фотожо
