Вÿд деч посна айдеме, янлык да кушкыл веле огыл, чумыр мландышар илен огыт керт. Чаманен палемдыман, пытартыш ийлаште республикнан ятыр кундемыштыже вÿд тавыштат, памашыштат, ерыштат я йöршын йомеш, я иземеш…
Морко районысо Кугу Шоръял ялыште вÿд уло, но Молодёжный уремыште верланыше ик тавын пураже йöршын шÿйын пытен да ужашын-ужашын каткалалтын йогаш тÿҥалын. Тыге огеш лий, тавым арален кодаш кÿлеш манын, ик кечын кандаш сурт гыч пошкудо-влак иквереш погыненыт да вÿдым налме верым уэмден олмыкташ кутырен келшеныт. Оксам поген, пел метр кÿкшытан 28 кÿртньö-бетон колчам налыныт да, манипуляторым тарлен, ялыш кондыктеныт. 8 Март пайрем да каныш кечылаште пашалан пижыныт: пöръеҥ-влак, шÿйын локтылалтше пурам рончен, чарашке луктыныт, олмешыже лебедко манме механизм полшымо дене 23 колчам волтен шынденыт.
– Иктаж лу пöръеҥ кечыгут толашышт. Мыйынат кум эргым кудыжо Йошкар-Ола гыч, кудыжо вес ял гыч тиде пашалан лÿмынак тольо. Шун дене амыргеныт да кечываллан кочкаш пурашат тореш лийыч. Тунам ме, озавате-влак, шокшо кочкышым уремышкак луктын пукшышна, – мане тиде таве гыч вÿдым налше Валентина Майкова. – Вес тавыже тораштырак. Мыланем гын вÿдым тушечын нумалаш нелырак. Каныш кечылан але иктаж паша дене шочмо кундем велыш толмышт годым мойн икшывем-шамыч тудым чыла гаяк йоҥгытыш нумалын кодат, да вара ямдыжым кучылтам.
Шонымо шукталтын. Таве рожысо да кумдыкысо шуным тарватылмылан кöра вÿд эше румбыканрак, но турлымекыже, ончычсо гаяк яндар да тамле лиеш.
Ынде пошкудо-шамыч, тыгакак оксам поген да иквереш чумырген, тавын тоштемше пу оралтыжым рончаш да олмешыже чатка гына профнастил «пöртым» чоҥаш кутырен келшеныт.
М.ИВАНОВА
Авторын фотожо
