Науко, образований да молодёжь политике шотышто комитетыште образований отрасль дене кылдалтше йодышым каҥашеныт.
Марий Эл Кугыжаныш Погынын профилян комитетшын заседанийыштыже республикыште туныктышо-влакым ситарыме да Морко районысо Коркатово лицейыште тунемше-влаклан илыме корпусым чоҥымо дене кылдалтше мутланымаш лийын.
Самырык-влакым вучат
Кадр шотышто каҥашымашым тарваташ амалым Марий Эл Кугыжаныш Погынын депутатше, Марий кугыжаныш университетын ректоржо Михаил Швецовын целевой заказ-влак (шымлымаш-влак) системым ыштыме нерген йодмашыже луктын.
Палемдыме йодыш-влак дене кылдалтше выступленийым регионын образований да науко министржын алмаштышыже Валентина Гаврилова ыштен. Тудын увертарымыж почеш, Марий Элыште чылаже 242 общеобразовательный организаций уло, тышеч 159-же – ял ден селалаште. Туныктымо пашаште 6400 еҥ тырша, нунын кокла гыч туныктышыжо – 4880. Педагог-влак кокла гыч 16,4 процентше 35 ияш марте ийготан улыт, 60 ийым эртыше – 21,4 процент. 20 ий утла стажан – 66,6 процент.
Тенийысе тунемме идалыкыште образованийым пуышо организацийлаште 304 самырык специалист пашам ышташ тӱҥалын, тиде 2025 ийысе деч кок пачаш наре шукырак. Школлашке 185 еҥ толын, йочасадлаш – 71, техникум ден колледжлаш – 39, ешартыш образований организацийлаш – 9.
Пытартыш 6 ийыште «Земский туныктышо» федеральный программе почеш 95 паша ойпидышым ыштыме. 2026 ийыште республиклан 10 квот ойыралтын.
Регионышто психолого-педагогический класс-влак ешаралтыт: пытартыш кум тунемме идалыкыште – 41 гыч 49 марте. Тушто чумыр налмаште 562 тунемше шинчымашым пога.
Педагогический класслам тунем пытарыше-влак кокла гыч 22,4 процентше (60 еҥ) туныктымо дене кылдалтше специальностьым ойыреныт. Тидыже план (20,4 процент) деч шукырак.
Марий Эл Образований да науко министерстве Марий кугыжаныш университет дене пырля 2026-2030 ийлан психолого-педагогический класс-влакын сетьыштым комплексно вияҥдыме мероприятий планым («корно картым») ямдылен.
132 вакансий уло
2026 ий 23 сентябрьлан общеобразовательный организацийлаште 132 вакансий уло. Поснак йодмашанлан математикым, физикым, руш йылмым да литературым, тӱҥалтыш класслам, технологийым туныктышо-влак кӱлыт. Тений абитуриент-влакым целевой направлений почеш тунемаш шагалрак налме. Ты шотышто каҥашымаште депутат-влак палемденыт: целевой тунеммашлан йодмаш приёмный кампаний тӱналме деч идалык ончыч пуалтеш, тиде абитуриент-влак дене пашам нелемда, вет нуно экзаменым кучымеке гына ончыкылык тунемме верым да специальностьым ойырат. Комитетын председательже Григорий Пейсахович целевой направлений дене тунемаш налме механизмым уэмдаш темлен. Тиде йодышым Россий Паша министерстве кӱкшытыштат тарватыме, но нелылыкым кораҥдаш законодательный решений-влак кӱлыт.
Республикыште педагог-влаклан социальный полышым пуымо паша умбакыже шуйна. Туныкташ толшо специалистлан икымше кум ийыште ешартыш оксам – оклад деч 50 процент марте надбавкым – тӱлат, ялысе коэффициэнт – 1,25. Тыгак илыме вер дене кылдалтше роскотлан тӱлымӧ оксам тичмашнек пӧртылтат, ялысе да селаласе тунемме верлаш туныкташ толшылан 300 тӱжем теҥге кугытан единовременный выплате пуалтеш, а оласыш – 200 тӱжем теҥге.
Кадр дене кылдалтше йодышым иктешлымаш тыгай лийын: ты шотышто сӱрет саем толеш гынат, тунемме верлаште квалификациян специалист-влакым умбакыже пашам ышташ кумылаҥдыме шотышто задаче ик эн тӱҥлан шотлалтеш.
Тӱшкагудым чоҥаш тӱҥалыт
Коркатово лицейыште посна тӱшкагудым чоҥымо шотышто йодмашым каҥашымаште увертареныт: тунемме верын кумдыкыштыжо кок модульный конструкцийым чоҥаш да нуным угыч ыштыме инженер сеть дене ушаш палемдыме. Проект-смете документаций ямде.
Марий Эл Образований да науко министерстве регионын Финанс министерствышкыже 2027 ийлан да 2028 ден 2029 ийласе плановый жаплан республикысе бюджет гыч «Образований» отрасльлан средствам ойырымо шотышто сводный йодмашым колташ палемден, тӱшкагудым чоҥымо пашамат тушко пуртымо. Тыгак министерствын увертарымыж почеш, 2027 ийыште Коркатово лицейын зданийжым олмыкташ тӱҥалыт, тидлан 68,7 миллион теҥгем ойырат.
Таче тунемме верыште 336 йоча шинчымашым пога. 99 тунемшыже Морко, Вожский, Звенигово, Медведево районла, тыгак йошкар-Ола, Волжск, Звенигово олала да Татарстан гыч улыт. Нуно лицейын интернатыштыже илат: ӱдыр-влак тӱҥалтыш школын оралтыштыже, а рвезе-шамыч кызытсе санитарный нормым да йодмашым шуктыдымо тошто кок зданийыште.
Комитет решенийым луктын: тений идалык мучаш марте Коркатово лицейыште выездной заседанийым эртараш.
Марий Эл Кугыжаныш Погынын пресс-службыжын уверже негызеш Галина Кожевникова ямдылен.
Фотом Марий Эл Кугыжаныш Погынын пресс-службыж гыч налме.
