Марий Элыште «Педагогический дебют-2022» всероссийский конкурсын отборочный этапше эрта. Тений тушто чылаже 24 самырык туныктышо усталыкшым ончыкта.
Номинаций-влак тыгай лийыт: «Самырык туныктышо-влак», «Школ деч ончычсо образовательный организацийын самырык воспитательже-влак», «Педагог-наставник».
Туныктышо ден воспитатель-шамыч йоча-влак дене пашам ыштыме мастарлыкыштым почмо урокым да йочасадысе занятий гоч ончыктат. А нунын опытан наставникыштлан мастер-классым эртарыман, тушто кажныже самырык педагогым тиде але тудо технологийым кучылташ туныктышаш.
Пытартыш этапыште конкурсант-влаклан шке нерген публично палдараш темлалтеш.
Сеҥыше-шамычын лӱмыштым 7 декабрьыште увертарат. Эн чолга самырык туныктышо-влак Марий Элын чапшым Россий кӱкшытыштӧ аралаш тӱҥалыт.
Г.Кожевникова
