Тыге ойлат Шернур район Лажъял кыдалаш школын туныктышыжо-влак.
Шернур район Лажъял школ мыйым ты гана шырчык муро дене вашлие: вес семынже лийынат ок керт, вет тудын ончылно шогышо кажне гаяк пушеҥгыште – тысе йоча, ача-ава да туныктышо-влакын кидышт дене ыштыме шырчыкомарта-шамыч. Школын тӱжвал пырдыжше ончычсо деч (мый тыште пытартыш гана шым ий ончыч шыжым лийынам) пешыже огеш ойыртемалт, но пӧртӧнчылжӧ да кӧргыжӧ шотышто йӧршынат тыге каласаш ок лий – чылажат тыште у да мотор. Икманаш, капитально олмыктымо пашан лектышыже – шинчаончылнак манын каласаш гына кодеш.
Тиде школым 2022 ийыште РФ Просвещений министерстве ден «Единый Россий» партийын тӱҥалтышышлан кӧра илышыш пурталтше федеральный проект почеш уэмдыме. Тидын марте витле ий наре тунемме верым ик ганат капитально олмыктымо огыл ыле, но кажне ийын у тунемме идалык вашеш туныктышо да ача-ава-влак «косметический ремонт» манмым ыштеныт.
– Ончычракше мемнан школышто пу кӱвар лийын, тудым эреак чиялтылме. Варажым линелеумым шарыме, но тудо палынак тоштемын. Школышто йоча-влаклан компьютер ситен огыл, ноутбукат кажне кабинетыште лийын огыл, проектор-влак тоштемыныт, – ойла школ директор Людмила Веткина. – Капитально олмыктымылан кӧра школ кумдык тӱзланен, у мебель да оборудований дене пойдаралтын. 2023 ийыште «Образований» нацпроектын «Кызытсе школ» федеральный проектше почеш школышто естественно-научный да технологический направленийла дене «Кушмо точко» рӱдерым почмо.
Лажъял школышто тунемше-влак тугакшат эреак чолга улыт, но жаплан келшыше тунемме кумдык нунылан моштымашым эшеат сайын вияҥден ончыко каяш да шкем ончыкташ йӧным ыштен. Теве ме школ директорын воспитаний паша шотышто методистше Эмма Еруткина дене ик класс гыч весыш пурен лектына. Коридор, тошкалтыш, кажне кабинет йоҥгыдо, кумылым нӧлтышӧ улыт. Чатка книгагудо, «Кушмо точко», «Центр детских инициатив» кумдык, коридорышто шахмат дене модаш ӱстел-шамыч, эртышым шарныктарыше мотор тоштер…
– Ме тыгай чапле кабинет деке ынде тунем шуынна да аралаш тыршена. Мо ончыч лийын да кызыт – ойыртем кугу. Оборудований сита, кабинетыште шокшо. Туныкташ чыла условий уло, – каласыш химийым туныктышо Алевтина Смородинова.
Чынжымак, тыгай школышто – тунемаш да туныкташ веле!
Йоча-влак школ формым чиеныт, а туныктышо-влак кажныже пуйто пайремыш толыныт!
Таче тыште 94 йоча шинчымашым пога, нунын дене 27 еҥан коллектив тырша, тышеч 16-шо – туныктышо. Кызытлан моткочак математикым да физикым туныктышо кӱлеш. Тений 1-ше классыш 8-9 йоча толшаш.
– 2025 ийыште тунемме верыште агрокласс почылтын. Тудлан кабинетым шкак келыштарен чиялтенна, сӱретла дене сӧрастаренна. Ты шотышто мыланна уста художникна Анатолий Антропов полшен. Каласыман, школ мучко улшо сӱрет-влак – чылажат лач тудын пашаже, – каласыш школым вуйлатыше.
Людмила Александровна школ директорын пашажым 2022 ий 1 сентябрь гыч шукта. Тидын деч ончыч верысе йочасадым вуйлатен.
– Йоча-влак келге шинчымашан веле огыл, тыгак шочмо элым йӧратыше кушшаш улыт. Ончыкыжым школышто шочмо кундемлан, тудын эртыме корныжо, геройжо, чапланыше еҥже-влак дене палдарыше кумдыкым ышташ шонымаш уло. Тек йоча-влак чыла тидым пален кушкыт, – каласыш Людмила Александровна.
Г.Кожевникова
Авторын фотожо.
