Эртыше кугарнян республикыштына «Марий Эл Республикысе кыдалаш профессионал образований. Цифрын жапше» II форум эртен. Самырык тукымлан кыдалаш профессионал образований аланыште тыршыше-влаклан регионым вуйлатыше Юрий Зайцев сай паша лектышым тыланен да ик эн уста пашаеҥ-шамычлан кӱкшӧ наградым кучыктен. Тудо палемден: «Мемнан задаче – элналан пайдам кондышо да тудын технологий суверенитетшым вияҥден толшо специалист-влакым ямдылаш».
Кокымшо гана эртаралтше мероприятий кыдалаш профессионал образований сферыште тыршыше ден студент-влаклан кучемысе органын пашаеҥже, паша верым пуышо, эксперт да социальный партнёр-шамыч дене вашкылым пеҥгыдемдыше площадкыш савырнен.
Тиде гана форумын тӱҥ темыже пашазе профессийлан туныктымаште тунемме программым уэмден вияҥдымаш да тушко цифран технологийым шыҥдарымаш лийын.
Марий Элыште кыдалаш профессионал образованийын вияҥ толмыжым лӱмынак форумлан ямдылыме да Республикысе курчак театрын фойештыже вераҥдыме интерактивный ончер почын пуэн. Тудын дене мероприятийын участникше-шамычым веле огыл, тыгак Йошкар-Оласе 12 общеобразовательный организаций гыч тунемше-влакым палдараш йӧным ыштыме. Йоча-влак радиоэлектронике, машиностроений, пилотдымо авиаций системе, чоҥымаш, ялозанлык, куштылго промышленность, услуго, образований сферылаште ончыкылык специалистым туныктымаште кучылтмо инноваций технологий, ик эн у оборудований, программе дене палыме лийыныт.
Форумышто Марий Элым вуйлатыше Юрий Зайцев лийын. Тудо палемден:
– Мемнан республикыште «Профессионалитет» федеральный программе сайын илышыш шыҥдаралтеш. Тудо студент-влаклан тачысе кечын ик эн йодмашан направленийла дене шинчымашым налаш да тунем пытарыме деч вара ик эн ончыл предприятийлаш пашам ышташ пураш йӧным ышта. Программе ялозанлык ден радиоэлектронике отрасль-шамычлан кадрым ямдылыше чыла техникум ден колледжым авалта. Нунын материально-технический базышт уэмдалтеш, тушто мастерской ден лабораторий-влак почылтыт, образовательный стандарт илышыш пурталтеш.
Шушаш ийын чоҥымо да корно отрасль-шамычланат формат дене кадрым ямдылыме паша тӱҥалеш.
Пленарный заседанийыште Марий Эл образований да науко министр Лариса Ревуцкая «Профессионалитет» федеральный программе нерген ойлымыж годым палемдымыж почеш, тудо таче кыдалаш профессионал образованийым вияҥдыше драйвер. Программе тунемме верлам вияҥдаш да студент-влаклан ик эн йодмашан специальностьым налаш веле огыл йӧным ышта, тыгак паша верым пуышо-шамычлан моткоч кӱлешан. Вет лач нуно тудын предприятийыштлан ик эн кӱлешан специалистым ямдылаш заказым ышта.
Форум кышкарыште эксперт сессий лийын. Министр Лариса Ревуцкая, Ончылгоч профессионально ямдылыме рӱдерым вуйлатыше Ирина Петрова, Марий Элын цифр вияҥмаш министрже Венедикт Суворов, Марий радиомеханический техникумын директоржо Ирина Бурханова да Полупроводник прибор-влак завод директорын вияҥме шотышто алмаштышыже Шамиль Шугаепов кызытсе экономикылан кадрым ямдылымаште регионысо образований системылан акым пуэныт.
Форумышто Марий Элым вуйлатыше ден образований да науко министр кыдалаш профессионал образованийым пуышо организацийлаште тыршыше-влакым награде дене палемденыт. Россий Федераций Просвещений министерствын Почётан грамотыжым автодорожный техникумын преподавательже Светлана Алметовалан да ты тунемме верынак мастерже Наталия Шарниналан, торгово-технологический колледжын преподавательже Ирина Ларионовалан, Марий радиомеханический техникумын директоржын алмаштышыже Ирина Пихтуллиналан кучыктеныт.
Г.Кожевникова
Д.Речкинын фотожо
