19 май – Пионерий кече. Пионерыш пуртымым, кум лукан йошкар галстукым шӱйыш пижыктен коштмым кажныже порын шарналта. Вет ты сылне пагыт йоча жапыш пӧртылта, чонышто волгыдо шарнымашым арала.
Йолташ-влак, пионер лийме жап мо дене ушеш лакемалт кодын?
Роза ИСКАКОВА, республикысе Калык усталык да тӱвыра ден каныме паша шотышто шанче-методике рӱдерын методистше, мурызо:
– Шке жапыштыже мый октябрёнок гына лийын шуктенам. Оҥышкем йошкар значокым пижыктен коштмем сайын шарналтеш. Акам пионер лийын, тудо галстукшым утюг дене эреак шымарта ыле. Галстук дене кошташ тӱҥалме жапым мыят чот вученам, но пионер радамыш пуртымым чарненыт.
Марина ВИНОГОРОВА, директорын воспитаний паша шотышто советникше (Звенигово район Шолэҥер кыдалаш школ):
– Морко район Купсола школышто мыйым пионерыш пуртеныт. Тыгай йӱла лийын: тунемше-влак 19 майыште, Кугуер воктене погынен, пионер тулотым ылыжтеныт. Кум школ (Арын, Азъял да Купсола) гыч погынен, костёр воктене муренна, кочкаш шолтенна, тӱрлӧ таҥасымаште чолгалыкым да писылыкым ончыктенна.
Алевтина СЕМЕНОВА, книгагудо вуйлатыше (Звенигово район Красногорский):
– Пионер лийме пагыт нигунамат огеш мондалт. Мый эше дружине советын председательже лийынам. Тидыж дене эшеат чот кугешненам. Паша шуко логалын: альбомым ыштен, тушко школ илыш нерген возенам. Пионерий кечын кум школышто тунемше-влаклан тӱрлӧ таҥасымашым иквереш эртареныт. Мыйже Керебеляк школышто тунемынам, идалык кокла гыч Морко район Кожлаер ден Вончӱмбал школла дене пырля вашлийынна.
Рапортым пуымо тат волгыдо шарнымашым арала. Школышто тунемме пагытым кугешнен шарналтем, илышна пеш весела лийын.
Елена ЛАЗАРЕВА, руш йылме ден литературым туныктышо (Морко посёлкысо 6-шо №-ан школ):
– 19 май – Пионер организацийын шочмо кечыже. Тиде кече мыйым уэш да уэш йоча пагытыш пӧртылта. Пионерышкыжат ме тиде кечынак пуренна. Тунемме жапыште (4-7 класслаште) илыш пионер организаций дене кылдалтын. Сбор, тӱрлӧ конкурс, мероприятий – чыла вере пионерий шкенжым ончыктен. Шарналтеш: куэгичкым, макулатурым, кӱртньӧ пудыргым погаш тӱрлӧ акций-влак лийыныт. Тимуровец-влакын пашашт, колхозлан полыш – туштат ме тыршенна. Икманаш, «Пионер – чылалан пример» – тиде девиз кажне йочан ушыштыжо шукемдымаш таблице семын лакемалт кодын. Садланак дыр тунамсе пионер-влак кызытат шеҥгелан огыт код.
Алевтина Байкова ямдылен
Фотом еш альбом гыч налме
