Марий Элын тазалык аралтыш министрже Марина Панькова тулык да ача-ава деч посна кодшо Лӱльпан йоча рӱдерыште илыше акак-шӱжарак Яшмолкинамытын у ий кумылыштым шуктен.
Вич ияш Катя сӱретлаш йӧрата, сандене чия да фломастер наборлан моткоч куанен. Тудо шӱм-чоным сымыстарыше тӱсан изи чемоданым йырже чумыргышо ӱдыр-влак ончылнак почын да эн ончычак мом сӱретлаш шичмыж шотышто шонкалаш тӱҥалын.
Лу ияш Маша Йӱштӧ Кугыза деч магнитан шахматым вучен, а лучко ияш Виктория – номер почеш чиялтен келыштараш сӱретым.
Пӧлекым акак-шӱжарак Яшмолкинамыт веле огыл налыныт, Марий Эл Тазалык аралтыш министерствын ава улмым да йоча пагытым аралыме пӧлкан начальникше Галина Мурзаева моло йочаланат шере кочкышан тичмаш мешакым намиен.
Маргарита ИВАНОВА
Марий Эл Тазалык аралтыш министерствын фотожо
