«Марий Элын еш династийже-влак» конкурс иктешлалтын.
Тудым Марий Элын профсоюз организаций-влак ушемышт эртарен. Чылаже конкурсыш Параньга, Марий Турек, Шернур, Медведево, Советский районла, Йошкар-Ола гыч 12 еш династий ушнен. Нунын нерген материалым автомобиль да корным чоҥымо озанлык, кугыжаныш учреждений, тӱвыра, чодыра озанлык, образований да науко, радиоэлектрон промышленность, связь пашаеҥ-влакын профсоюз организацийышт колтеныт.
Иктешлыше мероприятийыште нине династийын историйышт йоҥгалтыныт. Кажныже шнуй тул семын кугезышт-влакын ойырен налме пашаштым ий гыч ийыш шуен толеш.
Сеҥыше-влакым икмыняр номинацийыште палемденыт да кажныштыже кум сеҥыше дене ойыреныт. «Тукым гыч тукымыш куснымылан» номинацийыште икымше верыш образований сферыште ыштыше Луковмытын–Новосёловмытын–Бондаревмытын, кокымшыш радиоэлектронщик Лежнинмытын, кумшыш чодыра отрасль пашаеҥ-влак Гнутовмытын– Отмаховмытын ешышт лектыныт.
«Ик эн илалше династий» номинацийыште икымше вер дене образований сферыште тыршыше Кутузовмытын, кокымшо дене радиоэлектронщик Овечкинмытын–Ивашкинмытын-Трухинмытын да кумшо дене чодыра пашаште тыршыше Буклаевмытын династийышт палемдалтыныт. Ойыртемалтше-шамычлан грамотым, кубокым, окса премийым кучыктеныт.
Ты конкурс самырык тукымым ача-аваштын, коча-коваштын пашаштым, надырыштым аклаш, еш йӱлаштым шуяш кумылаҥда. Кеч нине династий шотышто кажныж нерген тыге каласаш лиеш. Мутлан, Шернур район гыч Гнутовмытын династийыштым налаш. Иван Васильевич – Россий Федерацийын сулло лесоводшо. Тудын ачажат, кочажат чодыра пашаште тыршеныт. Шкежат 25 ий Шернур лесничествым вуйлатен. Кызыт «Сигма» ООО-н директоржылан ышта. Татьяна пелашыже – Марий Элын сулло лесоводшо. Ты отрасльыштак нунын кок ӱдырышт тыршат. Гнутовмытын паша стажышкышт Иванын изажын да ватыжын ачажын стажыштым ешараш гын, династийын стажше 100 утла ият лиеш. Александра Гнутова – ты ешын нылымше тукымжын еҥже. Тудо Марий Элын Пӱртӱс поянлык, экологий да йырым-йырысе средам аралыме министерствыжын вӱдышо специалист- экспертше. Ойлымыж почеш, ӱдырлан марий чодырам уэмден толмо пашам шукташ келша. «Тиде моткоч кӱлешан да суапле паша. Мый тудын кеч изи, но ужашыже улам. Чын илыш корным ойырен налынам манын ӱшанем!», — палемден шкеже. Конкурсышто династийышт дене палдараш тудлан ачаже полшен.
С.Носова
Снимкыште: Иван ден Александра Гнутовмыт – профсоюз организаций-влак ушем вуйлатыше Александр Майоров дене пырля.
Фотом соцкыл лаштык гыч налме.
