Быт обслуживаний да илыме вер ден коммунал озанлык пашаеҥ-влакын кечышт вашеш
Советский посёлкышто лийше-влак деч ик гана веле огыл ӧрын ойлымым колаш логалын: могай тыште арулык!.. А ты пашам тыште «СоветскКоммунКомплект» ООО шукта.
Да ты пашам тудо 2009 ийыштак тӱҥалын – посёлкысо уремлам эрыктен, шӱкым чумырен-шупшыктен. А 2019 ийыште тиде йодыш дене лӱмын регионал операторым – «Благоустройство» ООО-м – ыштымеке, тудын гоч шке сомылжым виктарен колтен. Лач ту жап гыч организацийыште кугу вашталтыш лийын: тӱҥалтыште 25 гыч 30 наре еҥ пашам ыштен гын, кызыт – 94 наре. Да кӱчык – кум ий – жапыште тынарлан кушмо! Мо кӱшеш?
– Ме регионал операторын эртарыме торглашке ушнена да контракт почеш обслуживатлыме кумдыкнам ий гыч ийыш ешарен толына. Ончыч Советский районышто 30 процент илем гыч гына шӱкым шупшыктымо гын, кызыт чыла гаяк кундемым авалтыме. Тылеч посна Оршанке, Кужэҥер да эсогыл Курыкмарий районлаште ты пашам шуктена, – каласыш «СоветскКоммунКомплект» ООО-н директоржо И.Х.Мухарлямов.
Тыге манмыж дене тудо ӧрыктарышат.
– Нимолан ӧраш, – мане Ирек Хазимуллович, – кушто лиеш, тушто иктаж базым арендыш налына. Курыкмарий велне, мутлан, Козьмодемьянскыште верланенна. Моло кум районлан тӱҥ базына – Советский посёлкышто. Тыге кок вере техникына шога – автомашинаже, тракторжо… А кажне машина пелен кок грузчик кудалыштеш. Вет шӱкым контейнерла гыч ястарыме дене пырля нунын йыр площадкым эрыкташ перна. Да кажне кечын.
А луман жапыште тидым ышташ – манаш веле. Южгунам яллаште корныжымат эрыктен огыт шукто. Тунам ял шотан илем администрацийлашке лекташ логалеш, вет шӱкым шупшыктымо маршрутшо нунын гочак ышталтеш. Корным шӱкымыланат нунак мутым кучат, тидлан бюджетышт гыч окса ойыралтеш. Сандене тидым верлаште тӱҥ шотышто эскерен шогат. А эрыктен огыт шукто гын, коммунальщик-влак деке йыҥгыртат, полшаш йодыт, вет нунынат тракторышт улыт. Но тыгайже, директорын ойлымыж почеш, шуэн лиеда.
Советский посёлко нерген ойлаш гын, тыште «СоветскКоммунКомплект» ООО шӱкым веле огыл чумырен шупшыкта, ола шотан илем администраций дене ыштыме контракт почеш уремламат эрыкта – куштыра дечат, лум дечат. Паркым, тротуарлам, автобус чарналтыме верлам шотыш конда. Эше тудын пашаеҥже-влак тӱзатыме пашам шуктат. Шошым теплицыште пеледыш озымым куштат да кеҥеж тӱҥалтыште площадьысе але скверысе клумбылашке кусарен шындат. Тыгай поро пашамат шке ӱмбакышт налыныт. Теве молан посёлкышто нуным пагалат да аклат.
– Район рӱдыласе калык шӱкым шупшыктымылан да тидлан тӱлыктымылан писын тунем шуктен гын, яллаште тидым йӱштынрак вашлийыныт. Сандене илем администраций-влакын эртарыме погынымашлашке коштын умылтарашат логалын. Шуко вере шӱкым йӱлалтылыныт, да эскерен шуктыдымыштлан кӧра тул кумданат авалтен кертын. А кукшо пагытыште тидым ышташ йӧршын чаралтеш. Адакше экологий локтылалтеш. Но ынде тидын эҥгекшым умылаш тунем шуктеныт. Яллаште контейнерлам шындыме деч вара шӱкым тушко опташ тӱҥалыныт. Тӱлымӧ шотыштат кызыт ӱчашыше уке. А шӱкым ме полигоныш шупшыктена, – рашемдыш Ирек Хазимуллович.
Ныл районышто ты пашам шукташ, мутат уке, шагал огыл технике кӱлеш. Но организацийын тидлан вийже сита – тракторге 25 единице техникыже уло. Тудым эреак уэмден толеш, шӱкым шупшыкташ ий еда ик-кок у машинам налеш. А тудо шулдо огыл – кредитлан эҥерташ перна. Но пашаже удан огыл кая – калык тудлан ӱшана, тыршымыжым акла.
Юрий Исаков
Снимкылаште: директор И.Мухарлямов; шӱкым шупшыктышо машина ялыш толын; посёлко тӱрыштӧ корным эрыктат.
Авторын фотожо
Йӧн дене пайдаланен, коммунал услугым шуктышо организаций-влакым да нунын пашаеҥыштым профессионал пайрем дене саламлем! Чылаштлан сайым гына тыланем: тек пашашт ушнен толеш, оксашт ситышын, а тазалыкышт пеҥгыде лиеш.
Ирек МУХАРЛЯМОВ,
«СоветскКоммунКомплект» ООО-н директоржо
