1 октябрьыште Параньга район Тошкемнур ял отышто марий кумалтыш лиеш.
Тидын нерген мыланна тудын организаторжо, тусо онаеҥ Анатолий Делянов увертараш йодын. Тений тушто кумалтышым кудымшо гана эртарат. Отыжо кушкыл шотышто поснак ойыртемалтше: куэ, писте, тумо, ваштар да моло пушенгат кушкыт.
Чылажат марий юмыйӱла радам дене келшышын эртышаш. Марий кӱслен йӱкшат йоҥгаш тӱҥалеш. А надырланже имньым пуаш палемденыт. Тушко Параньга велысе илемла гыч веле огыл кумалаш мийыше-влакым вучат. Республикысе Марий юмыйӱла ушемын онаеҥже-влак деч посна, Пошкырт вел гычат толаш сӧреныт.
С.Носова
