Марий кумалтышын чинче тушыжо:
«Марий калыкын туныктышыжат уло, эмлызыжат уло, шымлызыжат уло, тӱвырам нӧлтышат уло, казна пашам ыштышыжат уло. Ты пагытыште зоотехникат кӱлеш, ветврачат кӱлеш, механик-влакат кӱлыт. Нуныланат, икшывыштланат, родо-шочшыштланат кӧргӧ вийым, куатым пу. Нунылан мемнам иквереш погаш полшет манын, Тыланет кумылына, Шочынава, вӱташте шогышо кум тӱрлӧ вольыкланна, кум тӱрлӧ кайыкланна, олыкышто коштшо кум тӱрлӧ вольыкланна таза лияш куатым пу. Вольык гыч вольыкым, кайык гыч кайыкым шочыкташ, исыржым тӱжым ышташ полшо манын, сӧрвалена, О, Шочынава!».
«Марий сугынь» книга гыч налме, 2005 ий.
Черке йӱла почеш:
11 ноябрь – Шорыкым тӱредаш тӱҥалме кече.
12 ноябрь – Зиновий-синичникын кечыже. Киса кайык, тыгак колызо ден сонарзе-влакын пайремышт.
13 ноябрь – Андрей Осеннийын кечыже. Тиде шыжын пытартыш кечыжлан шотлалтын.
14 ноябрь – Акым налде тыршыше святой Косма ден Дамианын кечышт. Теле да йӱштын тӱҥалме кече.
16 ноябрь – Аннан кечыже. Ты кечын игечым чот онченыт: «Анна лум деч посна гын, вес ийын кинде сайын шочшаш» але «Анна йӱштӧ, шыжат шужен илыман лиеш» ойленыт.
17 ноябрь – Ерёман кечыже. Осал вий дене вашлияш огыл манын, ты кечын мӧҥгыштӧ шинчыман улмаш.
Арака йӱмӧ язык деч утлаш полшышо молитва:
«Юмым шочыктышо Эн Святой ава, шке йочат верч шинчавӱдым йоктарыше ава-влакын, шке марийышт верч шортшо ватыштын, тулык да нужна да йӱшӧ ача-аван коден кайыме йоча-влакын, да мемнан чыланнан, Тыйын Юмоҥат ончылно сукен кумалше-влакын, йодмынам нал. Да тиде мемнан сӧрвалымына тыйын кумалмет дене Эн Кӱшнысын престолжо марте шуэш». «Марла молитва-влак» книга гыч налме, 2005 ий.
Шарнаш кодшо ой:
Сокыр парня вошт ужеш.
Пыжаш ыштыде, кайыкат ок мунчо.
Юмын пӱрымаш – шолып сомыл.
Вуйжо кая гын, почшат кая.
Уда еҥ порым ок шарне, сай еҥ осалым ок мондо.
Корно ончыктышо шуко уло, корнылан кинде пуышо уке.
Илыш пиалым савыра.
Палым тӧшакыште вучен огыт кий.
Кӧ пашам йӧрата, калык тудым пагала.
Сай пашан шулдыржат кумда.
А.Е.Китиковын «Калыкмут» книгаж гыч налме, 1991 ий.
Ӱмырым илен эртарышын каҥашыже:
«Йомдараш илышым гына лиеш, чыла молым муаш да тӧрлаташ жап уло».
«Нигунам шкаланет ӱшаным ит йомдаре, тудо тыйым эше ик гана веле огыл утара».
Светлана Носова ямдылен
Снимкыште: ял шеҥгелне каныме вер.
Авторын фотожо
