Марий Эл гыч археолог-влак марий-влакым тойымо ожнысо верым муыныт.
Тений Чувашийысе Моргауш районышто верланыше Чебоксар водохранилище кумдыкысо отрошто раскопкым эртарыме годым МарНИИЯЛИ-н отрядше XI–XII курымласе шым шӱгарым верештын.
– Тачысе кечылан ты памятник кундемыште 35 тойымо верым пален налме. Тӱҥалтыште тушто ожнысо марий ӱдырамаш вургемыште кучылталтше ятыр сӧрастарышым мумо. Кокымшо тӱшкаште тыгай ӱзгар-влак вашлиялтын огытыл. Тиде мо дене кылдалтме эше тӱрыс раш огыл. Кызыт шымлыме паша умбакыже шуйна, – палдарен институтын пашаеҥже Александр Акилбаев.
Л.Камалетдинова
Фотом интернетысе соцкыл лаштык гыч налме
