УВЕР ЙОГЫН

Троллейбус, кушто улат?

Лишыл жапыште Йошкар-Оласе пассажир-влак тӱшкан пайдаланыме троллейбус ден автотранспортын кузе коштмыштым шкештак тергаш тӱҥал кертыт. 

Рӱдолан администрацийже ГЛОНАСС/GPS спутник навигаций системым шыҥдарыме негызеш еҥ-шамычым шупшыктымо пашам тӱҥ гычак саемдаш палемден. Ты системе тӱшкан пайдаланыме транспортын ыштыме чыла радамжым: паша режимым, кудалыштме жап коклам, маршрутыш мыняр транспорт лекмым да мыняржын кудалыштмым, коштмо схемым шуктымым да молымат – терга да эскера.

Тӱҥалтыш йыжыҥыште системе троллейбус транспортым гына авалта. Шукеш огыл, рӱдоласе чумыр транспорт тушко ушна. Маршрутыш лекше чыла троллейбус 15 ноябрь марте «Яндекс-Транспорт» системыш ушналтшаш. Тергыме у йӧн тидын годымак  олаште илыше ден тудын унаже-влаклан рӱдоласе тӱшкан пайдаланыме транспортын пашажым минут еда эскераш полша. Смартфонлаште вераҥдыме оксам тӱлыде пайдаланыме мобильный приложений гоч пассажир тудлан кӱлеш транспортын лач кызыт кушто улмыжым, тудын шогымо остановкыш мыняр жап гыч толын шумыжым, чумыр маршрутшым пален налын кертеш. Увер тыгак Йошкар-Олан официальный сайтыштыже вераҥдалтеш.

А.АНДРЕЕВ

Опубликовать в Одноклассники

Добавить комментарий