«Журавушка» рӱдерыште специальный военный операцийыште участвоватлыше-влакын йочаштлан тазалыкым пеҥгыдемдыме кеҥеж смене тӱҥалын.
Икымше сменыште чылаже 170 йоча, ты шотыштак военнослужащий-шамычын ешышт гыч 111 ӱдыр-рвезе, кана.
Сменым Россий Федерацийын да Марий Элын кугыжаныш флагыштым нӧлталме, торжественный линейкым эртарыме дене тӱҥалме.
Йоча-влакым саламлаш, нунын могай условийыште илаш тӱҥалмыштым ончалаш Марий Элым вуйлатыше Юрий Зайцев миен. Тудо тыгак ӱдыр-рвезе-шамычым Йоча-влакым аралыме тӱнямбал кече дене саламлен.
«Те тышке икте-весе дене палыме лияш, келшаш да веселитлаш толында. Чаманен палемдаш логалеш, йоча ден самырык пагыт пеш писын эртен каят, сандене тиде жапым пайдалын эртарыза. Мый тыланда сайын каналташ да вийым погаш тыланем. Тиде пайремышкыда уло кумылын тольым. Ӱжмыланда тау», – палемден Юрий Зайцев.
«Журавушка» рӱдер Звенигово районышто, сылне Таир ер серыште верланен. Тыште йӱштылмӧ пагытлан кызытсе жаплан келшыше пляжым келыштарыме.
Ийготыш шудымо-влаклан социально-реабилитационный рӱдерым вуйлатыше Андрей Мотовиловын каласкалымыж гыч, йоча-влак чыла шотыштат йӧнан пӧлемлаште 3-4 еҥ дене илат. Каналташ да тазалыкым пеҥгыдемдаш актовый, модмо да ЛФК зал-влак, футбол пасу, волейбол ден баскетбол площадке-шамыч, йоча городок улыт.
Марий Элым вуйлатыше йоча-шамычлан пӧлекым кучыктен, ӱдыр-рвезе-влаклан, ты шотыштак элнам аралыше сарзе-влакын икышывштлан, канаш келыштарыме кумдыклам ончен савырнен.
2023 ий кеҥежым «Журавушка» рӱдерыште куд сменым эртараш, тыгодым 1020 йочам, ты шотыштак неле илыш ситуацийыш логалше, тыгак СВО-што участвоватлыше сарзе-влакын ешышт гыч да ЛНР, ДНР, Запорожье кундемла гыч толшо 510 ӱдыр-рвезым, кандараш палемдыме. Августышто инклюзивный да йочалан келшыдыме койышан, тӱрлӧ профилактический учётышто шогышо ӱдыр-рвезе-влаклан смене-влак лийыт.
Марий Эл Республикым вуйлатышын администрацийжын информаций пӧлкажын уверже негызеш М.ИВАНОВА ямдылен
