Пошкырт кундемысе Мишкан селасе «Мер кӱсӧ» шнуй отым Башкортостан Республикын тӱвыра поянлык объектше-влакын перченьышкышт пуртеныт.
«Тиде – марий калыкын пӱртӱс да тӱвыра поянлыкшым арален кодымаште моткоч сай ошкыл», – увертарен Пошкырт кундемысе «Эрвел марий» калыкле- тӱвыра автономий вуйлатыше Радион Плотников организацийын воткыл лаштыкыштыже.
Шукерте огыл республикым вуйлатыше Радий Хабиров Мишкан районыш паша дене толын коштын. Лач тунам тудо марий отым тӱвыра поянлык объект-влакын реестрышкышт пуртышашлан порученийым пуэн. Тудо шкежат тунам «Шукын кумалтыш» манме вес отышто лийын.
«Национальный, тӱвыра йӱла-влак – айдеме тукымын ик эн тӱҥ поянлыкше улыт. Нунын гоч айдемын чыла моторлыкшо – йылмыже, тӱвыраже, йӱлаже, религийже – почылтеш. Марий-влакын кумалме отышкышт икымше гана логалынам. Йӱр лачеш толын, тиде сай пале гай мыланем чучеш. Шнуй писте воктеке миен, шкаланем вий-куатым йодым: республикнам ончыко виктараш, СВО-што улшо рвезына-шамычлан полшаш, тек нуно сеҥымаш дене илыше да таза пӧртылыт. Сандене чыла шонымаш шукталтшаш», – каласен Радий Хабиров «Башинформ» савыктышын корреспондентшылан вашештымыж годым. Шергакан уналан мишкан марий-влак теркупшымат пӧлекленыт.
Краевед, историк, онаеҥ Вячеслав Камильянов ты отын историйже, кумалме йӱлаж дене палдарен. «Шукын кумалтыш» отыш тыгак тӱшка калык мер юмылан кумалаш коштеш. Тудо тӱня кумалтышым эртарыме ото деч нимо денат ӱлыкшӧ огыл. Кеч шке жапыштыже посна общине гына кумалын, но вара нуно, пырля ушнен, пелешташ тӱҥалыныт. Совет жапыште кумалме йӱла шыпланен гынат, варажым тудым ылыжтеныт. А 2016 ийыште Мишканысе марий историй да тӱвыра рӱдерын темлымыж почеш, тысе калык чумырген, тудым тӱзатен шынден.
«Шукын кумалтыш» Пошкырт кундемысе тӱвыра поянлык объект-влак радамыш пурен шуэшак манын ӱшаныме шуэш. Мишкан марий-влак ты шотышто чот тыршат.
Светлана Носова
Снимкыште: Радий Хабировын отыш толын коштмыж годым.
Фотом «Башинформ» савыктышын воткыл лаштыкше гыч налме.
