Марий Элым вуйлатышын пашажым жаплан шуктышо Юрий Зайцев Йошкар-Оласе А.С.Пушкин лӱмеш 4-ше №-ан гимназийын тунемшыже-влакым Шинчымаш кече дене саламлаш миен.
Торжественный линейке годым тудо палемден: «Икте угыч шочмо школышкыжо шинчымашым налаш толеш гын, весе – илышыштыже икымше гана. Икымше классыште тунемаш тӱҥалше-влаклан сеҥымашым тыланем. Тиде – кугу илышыш икымше ошкыл».
Каласыман, тиде гимназий шуко областьлаште сеҥымашыже дене чапланен. Йоча-влакым патриотизм шӱлышлан кумылаҥден пашам ыштыше туныктышо коллектив Россий Федераций правительстве пеленысе Россий кугыжаныш историй-тӱвыра рӱдерын шарнымашан знакше дене палемдалтын. Российын ТОП-500 эн сай школжо радамыш гимназий кок гана лектын да «Российын ончыл тунемме тӧнежше-влак» национальный реестрыш пурталтын, а 2021 ийыште «Отечественный образованийын кугешнымашыже» чумыр Россий смотр-конкурсышто сеҥышын дипломжо дене палемдалтын. Тунемме верын генерал А.А.Брусилов лӱмеш кадет корпусшо Марий Элыште кадет толкынын флагманжылан шотлалтеш да Обороно министерствын вузшо-влаклан самырык еҥ-влакым ямдыла.
Марий Эл Республикым вуйлатышын организаций да аналитике виктемжын уверже-влак негызеш Г.Кожевникова ямдылен.
Д.Речкинын фотожо
