Йошкар-Оласе «Отечествын геройжо-влак» рӱдерыште «Кугу Отечественный сарын урокшо да кызытсе параллель» теме дене эксперт площадке лийын.
«Без срока давности» научно-просветительский проект кышкарыште эртарыме мероприятий 1941-1945 ийласе Кугу Отечественный сар годым нацист да нунылан полшышо-влакын военный преступленийышкышт логалше тыныс калыкнан орлыкшо нерген шарнымашым арален кодымылан пӧлеклалтын. Тудо Отечествын историйжым чын огыл ончыкташ тыршыме ваштареш, тыгак самырык тукымым патриотизм шӱлышеш ончен куштымылан виктаралтын. Тиде шонымашыш шуаш манын, секретныйлан шотлалтше архив документым почыт, верлаште кычалме пашам эртарат, тыгак просветительский акцийым, научный конференцийым да моло мероприятийым эртарат.
Эксперт площадкын модераторжо семын Николай Лузан (писатель, спецслужбо историк, лӱдыкшыдымылык орган-влакын ветеранже, сылнымут да искусство областьлаште эн сай произведенийлан Россий ФСБ-н премийжын, А.Грибоедов лӱмеш литератур премийын лауреатше, журналист да писатель-влакын «Мы горды Отечеством своим» всероссийский конкурсын сеҥышыже) выступатлен. Мероприятийыште Йошкар-Ола округым вуйлатыше, Россий военно-исторический обществын Марий Элысе пӧлкажын председательже Евгений Кузьмин, МарГУ-н ректоржо Михаил Швецов, Марий Элын тӱвыра, савыктыш да калык-влакын пашашт шотышто министржын алмаштышыже Михаил Матвеев, историк, студент да тунемше-влак лийыныт. «Йыргешке ӱстелыш» Норвегий Королевствын гражданже-влак – меръеҥ Татьяна Торесен (Затолокина) ден историк да писатель Магне Хаугланд – ушненыт.
Участник-влаклан «Пётр Боцманов, воскрешение из ада» видеофильм ончыкталтын. Тудо Марий АССР-ын Советский районысо Кугу Акашево селан эргыже (1916 ийыште шочын), политрук, лейтенант П.И.Боцмановлан пӧлеклалтын. Землякнам гестапон Норвегийысе «Аркивет» тюрьмаште лӱен пуштыныт.
Эксперт площадкыште тыгак Марий Элын сулло художникше Андрей Санниковын сӱрет да плакат ончерже дене палдареныт.
Мероприятийым эртарыме жапыште «Бессмертный полк России» мер толкынын регионысо пӧлкажым вуйлатыше Виталий Лежанин тений «Союз объединений по увековечиванию и охране исторической памяти, защите жертв нацизма и противодействию фальсификации истории» Тӱнямбал мер ассоциацийым ыштыме шотышто план дене палдарен. Тушко Россий Федераций, Абхазий, Беларусь республикла, Норвегий Королевстве, гыч эксперт-влак пурталтыт. Россий Федерацийыште да чек вес велне икоян-влакым кычалыт.
Мероприятий Марий Эл Тӱвыра, савыктыш да калык-влакын пашашт шотышто министерствын полшымыж дене эртен.
Марий Эл Тӱвыра, савыктыш да калык-влакын пашашт шотышто министерствын пресс-службыжын материалже негызеш Галина Кожевникова ямдылен.
Фотом Марий Эл Тӱвыра, савыктыш да калык-влакын пашашт шотышто министерствын пресс-службыж гыч налме.
