Кызыт шагал огыл еҥ самырык тукымым утларак жапым гаджет дене эртарымыжлан, сурт сомылкам кумылдымын шуктымыжлан, ончыкылык илыш нерген азапланыдымыжлан шылтала веле огыл, эсогыл вурса! Но йырым-йыр тӱткынрак ончалаш гын, чылт тыгежак огыл: республикыштына шкем чыла велымат тергыше да вияҥдыше ӱдыр-рвезе-шамыч эше ситышынак улыт! Мутем – Звенигово район Красногорский посёлкысо 2-шо №-ан школын 6-шо классышкыже вончышо Елизавета ЗАПЕВАЛОВА нерген.
Лиза школышто тыршен тунеммыже, отличник улмыж дене веле огыл, мер пашаште чолгалыкым ончыктымыж денат ойыртемалтеш. Тудо поснак руш йылме ден сылнымут, математике предметлам йӧрата, художественный произведенийлам сылнын лудеш. Тений Самырык лудшо-влакын «Илыше классике» конкурсыштын регионысо йыжыҥыштыже Н.Абгарянын «Манюня» книгаж гыч тӱҥ героинян койыш-шоктышыжым мастарын почын пуымыж дене сеҥыше кум еҥ радамыш логалын. Май мучаште «Артек» тӱнямбал йоча рӱдерыште конкурсын россий да тӱнямбал кӱкшытан йыжыҥлаштыже участвоватлен, финалыш лектын да мӧҥгыжӧ шӧртньӧ медаль дене пӧртылын. А 8 июньышто Москвасе Йошкар площадьыште эртаралтше суперфиналыште мастарлыкшым терген.
– Ты гана сеҥыше-влак радамыш шым логал, – тӱрвыжым чаманышыла куптыртыш ӱдыр, – но мыланем конкурсышто участвоватлымыжат моткоч шергакан – уло кушко да молан кушкаш!
Е.Запевалова – путырак кожмак ӱдыр. Тудын кӱлдымӧ сомыл дене шинчылташ жапше уке гаяк, гаджетымат кидышкыже уш-акылжым пойдараш веле налеш. Эше кок ий ончычак ротанг дене тӱрлӧ кугытан да форман кашпом пидаш тунемын.
– Тидлан авам кумылаҥден. Ик каныш кечын Йошкар-Олашке ротанг дене пидме мастер-классыш тарваныш да мыйымат пеленже нале. Мыланем тиде сомыл палыдыме ыле, но мо да кузе ышталтмым ужын, кеч изи кашпом келыштараш кумылем лекте. Авам занятийлан оксам тӱлыш, да мый группышто арверым эн ончыч пидын пытарышым, – нимыняр аптыраныде рашемдыш Лиза.
Тылеч вара аваже материалым налын, да ӱдыр пашалан пижын. Ончыч шке илыме верыштлан келшыше кашпом пидын, вара – родышт ден палымыштын йодмышт почеш, ынде эсогыл пазарыш ужалаш луктеш.
– Налыт, эше заказым ыштат! – куанен манеш.
Чынак, изи кидмастар воктеч шагал еҥ чарналтыде эртен кая. Поснак ӱдырамаш-влак шогалыт, келшыше кашпом, кидышкак налын, йыр савыркален ончат да, «могай молодец улат» манын, чарныде моктат.
Мылам гын эше ротанг денак пидме шкешотан сумка моткоч келшыш.
– Шукерте огыл пидаш тӱҥалынам, – шыргыжале Лиза. – Эше мебельым келыштараш тунемнем, но тыгай курсыш 14 ияш да тылеч кугурак ийготан-шамычым веле налыт. Туге гынат ик ӱстембалым интернетыште верештме мастер-классын полшымыж дене уже пидынам!
Ӱдыр ротанг дене пидме арверым ужалыме оксам кызытеш тӱҥ шотышто материаллан кучылтеш, но ончыкыжым маймылым налаш шона.
–Тиде янлыкым шукертак йӧратен шынденам. Палем, тудым шке пӧртыштӧ ончаш моткоч неле, но лиеш! Кеч авам мӧҥгыштына тугакшат маймыл-влак ситышын улыт манеш, – воштылеш Е.Запевалова.
Шижалтеш, тиде ӱдырын шкем тергыме да вияҥдыме, оксам ыштен налме, ончыкыжым йол ӱмбаке пеҥгыдын шогалме шотышто шуко шонымашыже уло, а нуным шукташ чарак уке гаяк. Тидыжым шукерте огыл пӧръеҥ ӱпым тӱредме курсым тунем пытарымыжат пеҥгыдемда. Кызыт Лиза модель-шамычын полшымышт дене опытым пога, ончыкыжым парикмахерскийым почаш шона.
– Но ротанг дене тӱрлӧ арверым пидме пашамат ом кудалте, – кошарварняжым кӱшкӧ нӧлталын манеш шкеже.
Школ деч вара Лиза юристлан тунемаш пурынеже, а вара судьялан пашам ыштынеже.
Теве тыгай тӱрлӧ шӧрынан ӱдыр – Елизавета Запевалова. Таче тудо шке иктаҥашыже-влаклан веле огыл, шагал огыл кугыеҥланат пеш чапле пример.
Маргарита ИВАНОВА
Авторын фотожо
