«МАРИЙ ЭЛ» ТАЧЕ

Тек кажне уверже куаным кондышо гына лиеш

«Марий Эл» газет редакцийым ынде тӱҥ редакторын ончычсо алмаштышыже Светлана Пехметова вуйлаташ тӱҥалеш. Але марте тӱҥ марий газетнан пӱтынь эртыме 109 ияш корныштыжо тиде кокымшо гана, кунам тудым ӱдырамашлан вуйлаташ ӱшаненыт.
13 январьыште палемдалтше Россий печать кечым «Марий Эл» газетыште ыштыше пашаеҥ-влак кугу вашталтыш дене вашлийынна. Ты пайремже савыктыме сату, электрон изданий, ТУЙ (СМИ) дене кылдалтше пашам шуктышо еҥ-влакым уша. А вашталтышыже республикысе савыктыше-влакым ик организацийыш ушымо дене кылдалтын. Мемнан редакцият ынде посна ООО огыл, угыч ыштыме «Марий Эл» кугыжаныш увер агентстве» кугыжаныш автоном учрежденийын шулдыр йымалныже лиеш. Тӱҥ редакторна Александр Абдуловым директорын икмыше алмаштышыжлан шогалтеныт. Тудо лачшымак национальный изданий-влаклан вуйын шогаш тӱҥалеш. Сандене шкенан у вуйлатышына-влаклан у паша верыштышт сай лектышым гына тыланыме шуэш.
Кажне ийын Печать кече вашеш ты сферысе пашам виктарыше, ворандараш полшышо республикын правительствыже, министерстве ден ведомство, мер организаций-влак лектышнам иктешлат, ойыртемалтше-влакым палемдат. Теният тыгак лие.
Ошыгечынже регион вуйлатыше Юрий Зайцев тӱрлӧ савыктыш вуйлатыше-влак дене вашлийын. Тудо погынышо-влакым профессионал пайрем дене саламлен да палемден: Интернет вияҥ толмо дене соцкыл, телеграмм-канал-влак шукемыт гынат, калыкыште СМИ савыктыш-влаклан ӱшан садак утларак шарлен.
Журналист этикым шотыш налмым да аудиторийлан тергыме да объективный данныйым пуымылан тауштен. Таче, поснак СВО кайыме пагытыште, СМИ сферыште тыршыше-влакын шке пашаштышт социальный ответственность дене, икте-весылан полшен, сомылым кӱлеш семын шуктымыште тӱҥ принципыш савырымым палемден.
«Президент Владимир Путинын палемдымыж семын Российысе СМИ-влак калыкнан икояным ыштымашке кугу надырым пыштат. Республикыште стабильный мер-политик обстаоновкым арален кодаш полшеда. Калыклан оперативный чын уверым пален налаш йӧным ыштыеда», – палемден Юрий Зайцев.
Тыгак тудо Россий Президентын кӱштымашыж почеш илышыш шыҥдарыме проект, ты шотыштак Марий Эл Правительствын пунчалже-влак дене калыкым палдарен толмылан тауштен.
Марий Эл правительстве председательын алмаштышыже, тӱвыра, савыктыш да калык-влакын пашашт шотышто министр Константин Иванов СМИ сферыште пытартыш вашталтыш-влак дене палдарен. Тудым илышыш шыҥдараш йӧным ыштымыжлан республик вуйлатышылан тауштен.
Россий Журналист ушемын Марий Эл пӧлкажым вуйлатыше Александр Абдулов регион вуйлатышым республикысе СМИ-шамычлан полшмыжылан да чыла лекше йодышым каҥашаш ямде улмыжлан тауштен. Вара Юрий Зайцев ойыртемалтше журналист-влакым палемден да наградым кучыктен. «Россий Федерацийын сулло журналистше» лӱмым «Марий Эл» ГТРК-ан радиовещаний службыжын шеф-редакторжо Маргарита Соловьева, «За заслуги перед Марий Эл» орденын медальжым «Марийская правда» газет редакцийын корреспондентше Дмитрий Шахатрин налыныт. Коллегынам, «Марий Эл» газетын медицине да социальный илыш йодыш шотышто редактор Маргарита Ивановам «Марий Эл Республикын сулло журналистше» чап лӱмым налме дене саламлена! Тыгак икмыняр еҥлан Марий Эл вуйлатышын Тауштымашан серышыжым кучыктеныт.
Кодшо идалыкысе паша лектыш почеш «Марий Элын шӧртньӧ перажым» ты гана «Марий Эл» ГТРК-ан икымше категориян корреспондентше Константин Микрюков сулен. Пашажым тыге кӱкшын аклымылан регион вуйлатышылан тудо тауштен.
Кажне ийын республикын тӱрлӧ отрасльже вияҥме шотышто журналист-влакын республиканский конкурсышт иктешлалтеш. Ты гана сеҥыше-влак радамыште «Марий Эл» газетын журналистше Юрий Юсаков лийын. Экономике йодышым тудо чынжымак ик эн сайын ончыктен шога.
Кечывал деч вара Россий печать кечылан пӧлекалтше торжественный мероприятий республикысе Курчак театрыште эртен. Журналист, савыктыше, редактор, корректор, радио-, теле- вӱдышо-влакым ушышо пайрем тений, залыште сценыш ончен шинчышыла огыл, чынжымак, пайрем кас семын веселан эртен. Чылашт ончыко ойыртемалтше-влакым луктын саламленыт, коклаште артист-влак выступатленыт, вуйлатыше-влак мутым ойленыт. Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Контантин Иванов погынышо-влакым саламлен. Республикысе газет пашаеҥ-влакын пашадарышт кушшаш манын ойлымыжат куандарыде кертын огыл. Тудо регион вуйлатышын саламлымашыжым лудын пуэн. Поснак чоныш тыгай шомак-влак логальыч: «Тауштем тыланда пашам шот дене шуктымылан, калыклан, землякна-шамычлан полшашак, шындыме цельыш шуаш тыршымыланда!»
Мутат уке, ты касыштат тӱрлӧ министерствын, ведомствын эртарыме конкурсышт иктешлалтыныт, вуйлатышышт ойыртемалтше-влаклан грамот ден дипломым кучыктеныт. Нунын нерген возаш тӱҥалат гын, кагазат ок сите. Но тыгай конкурслаште ойыртемалтмаш журналист-шамычлан садак у сеҥымашке шуаш негыз, могай-гынат мотиваций. Мый шкенан редакций гыч сеҥыше-влакым гына палемден кодем: тиде – образований да науко шотышто редактор Галина Кожевникова, еш да йоча шотышто редактор Любовь Камалетдинова. Марий Эл Журналист ушемын эртарыме конкурсыштыжо «СВО-н геройжо-влак» номинацийыште спорт йодыш дене редактор Елена Эшкинина сеҥышыш лектын. Тений тудо чынжымак кугу пашам шуктен, СВО дене кылдалтше теме дене ятыр сай материалым возен. Тидын нерген сераш куштылго огыл, еҥ-шамычын ойгыштым чон гоч колташ логалеш.
Туге гынат, илыш ончыко кая, кажне кече уверым конда, а ме нунын дене калыкым палдаренак шогышаш улына. Тугеже тек кажне уверже куаным кондышо гына лиеш.
Светлана Носова
Д.Речкинын фотожо.

Опубликовать в Одноклассники

Добавить комментарий