11 апрельыште И.С.Палантай лӱмеш тӱвыра да сымыктыш колледжын А.Эшпай лӱмеш кугу концерт залыштыже чапланыше флейтист, РСФСР-ын сулло артистше, педагог, музыкант, Шернур районысо Тумерсола ялын эргыже Виталий Шапкиным шарныме лӱмеш «Приношение Артисту» концерт эртен.
Куд шагат кас лишан залыш изижге-кугужге толаш тӱҥальыч. Ик тат гыч йӱк-йӱаным флейтын ныжыл семже алмаштыш. Виталий Владимирович семӱзгарышкыже пуалын, кӱлеш паҥга-влакым темдыштын, тошто марий семым (К.Гейстын обработкыжо) луктеш. Шоктымо семже окна гыч пурышо кечыйол дене пуйто модеш, чоным вӱчка, но тыгодымак кумыл тодылалтеш да логар пундашке комыля шинчеш. Уке тудо пеленна, уста флейтистын шоктымыжым ынде экраныште веле ончен да войзен налме гоч колышт кертына. Идалык утла ончыч сымыктыш тӱня ик эн талантан музыкантше дене ӱмырешлан чеверласыш.
Виталий Владимирович йӧратыме флейтыжым Российысе веле огыл, Беларусьын, Китайын, Украинын, Литван, Венгрийын, Эстонийын Финляндийын шӱдӧ утла олаштышт шоктен.
В.Шапкинын илышыштыже музык ик эн ончыл верыште лийын, тудын дене илен, пашам ыштен, илаш вий-куатым налын. Кушкын толшо тукымым музыклан шӱмаҥдымаштат тудын надырже моткоч кугу. Виталий Владимирович интернат-школышто, культур колледжыште ятыр ий дене тыршен, самырык ӱдыр-рвезе-влаклан кумда сценыш лекташ полшен. Шкенжым тудо кугу туныктышылан шотлен огыл, но классыштыже кажне икшывым музыкым йӧраташ туныктен. Талантан педагогым тунемшышт-влак веле огыл, нунын тунемшыштат сайын палат да шарнат. Тидымак шотыш налын, концертым колледжын флейтист-влак ансамбльже «Ave Maria» музык дене почо. Варажым сценыш Озаҥ оласе Н.Жиганов лӱмеш кугыжаныш консерваторий пеленысе музыкальный школын тунемшыже Е.Леонтьева лекте. Екатерина Виталий Владимировичын йӧратыме тунемшыже Венера Порфирьеван ӱдыржӧ улмаш.
Виталий Шапкинын ешыже кугу. Икымше пелашыже, Екатерина Андреевна, кок ӱдырым пӧлеклен. Марта (кызыт – Банаева) ден Надежда (кызыт – Вахрамеева) ача-аваж семынак музык аланыште талантан кушкыныт, кызыт коктынат профессионал музыкант улыт. Тидым ме эртыше концертыште эше ик гана ужын да шижын кертна. Ӱдыр-влакын фортепиано дене шкетынат, дуэт денат шоктымыштым нимучашджымын колышташ лиеш, а мастарлыкышт дене кугешнаш веле кодеш.
Кокымшо пелашыже Лидия Григорьевна дене вич шочшым ончен куштеныт. Эрге-шамыч кокла гыч Григорий ачаж семынак флейте дене шокташ тунемын да чон йӱлен ты сомылым кызытат шукта. Фортепьяно почеш (концертмейстерже – Н.Вахрамеева) курыкмарий сем-влакым (А.Эшпайын обработкыжо) шоктымыжым ачажат кугешнен «колышто». Тыгодым экраныште лач тудо пиалан шуко шочшан ешын фотокартычкыже шинчалан перныш.
В.Шапкиным усталык пашалан Светлана Анатольевна пелашыжат (кумшыжо – авт.) чот кумылаҥден, лач тудо музыкантын эн ӱшанле еҥже, йолташыже лийын. Пырля нуно кок эргылан ош тӱням пӧлекленыт. Пелашыжым шарналтен, С.Шапкина «Предание» (В.Захаров) произведенийым колышташ темлыш. Шоктен пытарымекыже, зал калык совым рӱж кужу жап перен тауштыш. Шарнем, 2019 ийыште Виталий Владимирович Э.Сапаев лӱмеш опер да балет академический театрыш ойыртемалтше концертыш ӱжын ыле. Тушто орган (А.Ушков ден А.Воронина), кӱсле («Чинчывий» ансамбль) да флейте (В.Шапкин) дене Вениамин Захаровын тиде произведенийжымак шоктышт да марий музыкын вийже нерген кугешнен каласкалыш.
В.Шапкин театрын оркестрыштыже коло утла ий пашам ыштен. Ты жапыште тудо ятыр концерт программым илышыш шыҥдараш полшен. Тудын тыршымыжым театрын пашаеҥже-влакат сайын палат да ял гыч лекше рвезын Юмын пуымо мастарлыкшым моштен кучылтмыжым, сеҥымашке шумыжым, пашам йӧратымыжым порын шарнат. Тидым концертыште мурышо артист-влак Александр Столбов, Павел Крюко ден Елена Никитина (концертмейстерышт – Н.Вахрамеева ден М.Банаева), оркестрыште пырля шоктышо йолташышт Альберт Мусинский (кларнет) ден Александр Сальников (кларнет, концертмейстерже – Е.Чернова) эше ик гана пеҥгыдемдышт.
В.Шапкин
Виталий Владимирович СССР-ын калык артистше, землякна Андрей Эшпай дене моткоч кужун келшен, возымо произведенийже-влакымат калык ончыко луктын да тудын денак чон почын мутланен. Композитор музыкант йолташыж нерген тыгерак ойлен: «Маэстро Шапкин – Европын эн сай флейтистше». Лач тидын нерген эше ик гана ушештарышт шарнымаш концерт мучаште.
Шарнымаш кас кок шагат наре шуйныш. Мутат уке, эн шуко жапым музыклан, мурылан ойырымо, вет лач тыгай лийын тудо шкежат, мемнан пагалыме да шерге йолташна, уста педагог, талантан музыкант В.Шапкин: шагалрак, но пеҥгыдын каласыше, чыным, но нимо деч чот музыкым йӧратыше.
Тек флейтыжын семже курымла дене йоҥгаш тӱҥалеш!
Алевтина БАЙКОВА
М.Скобелевын фотожо
