Тӱвыра пашаеҥын кечыжлан да Театрын тӱнямбал кечыжлан пӧлеклалтше пайрем Э.Сапаев лӱмеш опер да балет академический театрыште эртен.
Тушко погынышо-влакым Марий Эл вуйлатыше Юрий Зайцев саламлен.
Тудо ушештарен, элнан Президентше Владимир Путинын увертарыме Россий калык-влакын икоян улмо идалыкыште Российысе театр пашаеҥ-влакын ушемышт 150 ийым палемда.
– Кок событийжат мемнам тӱҥалтышыш пӧртылта. Культур айдемын шӱм-чонжым, рӱдыжым чоҥа, тудын икымше эн пеҥгыде негызше ешыште пышталтеш. Садлан тендан пашада – туныкташ, воспитатлаш, ушаш – эн кӱлешанлан шотлалтеш. Вет те ешын тӱҥалме пашажым умбакыже шуен толыда да еш поянлыкым калыкыныш савыреда, – палемден регион вуйлатыше. – Еш, тудын икоян улмыжо да тукым гыч тукымыш шуен толмыжо «Еш» национальный проектын эн тӱҥжылан шотлалтеш.
– Ме умбакыжат театр, тӱвыра пӧрт-влакым уэмдаш, тӱрлӧ кумдыкым ышташ тӱҥалына, куштыжо те шканда кӱлешаным муын кертыда. Кугу руш тӱвыра подвигым ыштен кертше еҥ-влакым эре куштен. Кеч-могай неле пагытыштат кугу произведений-влак шочыныт. Таче мемнан элна шке эрыкше да ончыкылыкшо верч ӱшанлын шога, воинна-влак чын верч кредалыт. Тыгай жапыште тендан пашадан эшеат чот аклалтеш, – каласен Юрий Зайцев.
Республик вуйлатыше икмыняр еҥлан наградым кучыктен: Россий Тӱвыра министрын Чап грамотшым – Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Ивановлан.
«Марий Элын калык артистше» лӱм дене М.Шкетан лӱмеш Марий национальный драме театрын артистше Андрей Бусыгин, «Марий Эл тӱвыран сулло пашаеҥже» лӱм дене Козьмодемьянск оласе А.Я.Эшпай лӱмеш йоча сымыктыш школын туныктышыжо, пианино ден рояльым тӧрлышӧ Василий Артюшкин, Советский посёлкысо йоча сымыктыш школын концертмейстерже Раисия Данилова, И.С.Палантай лӱмеш тӱвыра да сымыктыш колледжын преподавательже Анатолий Ермаков, Э.Сапаев лӱмеш опер да балет академический театрын художник-декораторжо Людмила Калугина палемдалтыныт.
Вес уверат куандарен: Марий книга издательстве директор Эдуард Иманаевлан у автомашина деч сравочым кучыктен.
Марий Эл Кугыжаныш Погынын председательже Михаил Васютин чылаштым пайрем дене саламлен да тӱвыра, сымыктыш аланыште тыршыше икмыняр пашаеҥлан Тауштымашым кучыктен.
Тӱвыра министр Константин Иванов кок пайремым иквереш эртарымым сайлан шотлен, Марий Эл правительствын полшымыж дене тӱрлӧ оҥай проектлам илышыш пырля шыҥдарена манын каласен. Республикна тӱрлӧ сеҥымашыж дене ончылно лийже манын, кажныже тыршеда, тидлан моткоч кугу тау манын ешарен. Варажым тудо кундемыштына ыштышаш паша дене кӱчыкын палдарен.
Тӱвыра аланыште ятыр ий тыршен пашам ыштымыштлан Марий Эл вуйлатышын Тауштымашыжым кучыктен.
Пайрем кечын тӱвыра министерствын «Ялласе эн сай муниципальный культур учреждений», «Ялысе тӱвыра учреждений-влакын эн сай пашаеҥышт» конкурслаште сеҥыше-влакымат диплом да пеледыш аршаш дене куандарен.
«Театральный Йошкар-Ола» фестивальым иктешленыт да Йыван Кырла лӱмеш национальный премий дене палемденыт. Премийым налше-влакым тений район администраций вуйлатыше, Российын Геройжо-влак да молат саламленыт.
Тӱрлӧ номинацийыште нуно ойыртемалтыныт:
– Гран-при – «Снегурочка» балет (Э.Сапаев лӱмеш опер да балет академический театр, Я.Эшпай лӱмеш Марий кугыжаныш филармоний);
– «Эн сай режиссур» – Владислав Константинов (Г.Константинов лӱмеш Руш драме академический театр, «Коварство и любовь»);
– Роман Алексеев (М.Шкетан лӱмеш Марий национальный драме театр, «Записки юного врача»);
– «Эн сай сценографий» – Надежда Иванова (Марий самырык театр, «Колумб. Легенды милые, прощайте…»);
– «Оперыште эн сай партий» – Валерия Баландина (Э.Сапаев лӱмеш опер да балет академический театр, «Свадьба Фигаро»);
– «Балетыште эн сай партий» – Валерия Старикова, Роман Стариков (Э.Сапаев лӱмеш опер да балет академический театр, «Снегурочка»);
– «Драме спектакльыште эн сай ӱдырамаш роль» – Людмила Казанцева (М.Шкетан лӱмеш Марий национальный драме театр, «Чоҥешта турня кашта»);
– «Драме спектакльыште эн сай пӧръеҥ роль» – Иван Соловьев (М.Шкетан лӱмеш Марий национальный драме театр, «Записки юного врача»);
– Андрей Алексеев (Марий самырык театр, «Колумб. Легенды милые, прощайте…»);
– «Кокымшо планан эн сай пӧръеҥ роль» – Кристина Довидайтис (Э.Сапаев лӱмеш опер да балет академический театр, «Свадьба Фигаро»);
– «Кокымшо планан эн сай ӱдырамаш роль» — Ксения Немиро (Г.Константинов лӱмеш Руш драме академический театр, «Коварство и любовь»);
– «Эпизодысо эн сай роль» — Ильнар Давлетшин (Э.Сапаев лӱмеш опер да балет академический театр, «Свадьба Фигаро»);
– «Ӱшан» – Алексей Милютин (М.Шкетан лӱмеш Марий национальный драме театр, «Чоҥешта турня кашта»);
Жюрин премийже:
– «Открытий» – «Марий Эл кугыжаныш куштышо ансамбль, Я.Эшпай лӱмеш Марий кугыжаныш филармоний.
– М.Шкетан лӱмеш Марий национальный драме театрын актер ансамбльже, Сергей Щеглов «Записки юного врача»;
– Григорий Архипов «Колумб. Легенды милые, прощайте…», «Чоҥешта турня кашта» спектакль-влаклан да «Снегурочка» балетлан музыкым возымыжлан;
«Зритель-влакын симпатийышт» – Роман Стариков (Э.Сапаев лӱмеш опер да балет академический театр, «Снегурочка»);
– «За честь и достоинство» – Владислав Константинов (Г.Константинов лӱмеш руш драме академический театр);
– СТД председательын премийже – Тамара Игнатьева (Россий СТД- Марий Элысе пӧлкаже);
– Директорын премийже – Любовь Купсольцева (Марий самырык театр);
– Мэрын премийже – Сергей Таныгин (М.Шкетан лӱмеш Марий национальный драме театр).
«Ялласе эн сай муниципальный культур учреждений»
– Кужмарий тӱвыра да каныме рӱдер (Звенигово район);
– Топкавлак ял клуб (Кужэҥер район);
– Кугу Карлыган ялысе тӱвыра пӧрт (Марий Турек район);
– Канторъял тӱвыра пӧрт (Морко район);
– Марий Йӱштӧ кугызан резиденцийже (Шернур район);
– Алексеевский тӱвыра пӧрт (Советский район).
«Ялысе тӱвыра учреждений-влакын эн сай пашаеҥышт»
– Маргарита Богданова, Косолоп ялысе тӱвыра пӧрт вуйлатыше (Марий Турек район);
– Надежда Якимова, Тошто Торъял тӱвыра пӧрт вуйлатыше (У Торъял район);
– Алевтина Шулепова, Сердеж тӱвыра да каныме рӱдер вуйлатыше (Шернур район);
– Эдуард Зырин, Шуарсола ялысе тӱвыра пӧрт вуйлатыше (Советский район).
Анатолий Иванов, гвардий лейтенант, Российын Геройжо:
– Те, тӱвыра пашаеҥ, театрыште тыршыше-влак, моткоч кӱлешан пашам шуктеда. Тыршымыда дене калыкын илышыжым волгыдыракым, веселаракым ыштеда, чоныш куан тулым чӱктеда. Ончыкшымат тӱрлӧ оҥай проектым илышыш шыҥдараш, чапле роль дене калыкым куандараш пеҥгыде тазалыкым тыланем.
Алевтина БАЙКОВА
Фотом Константин Ивановын МАХ каналже гыч налме
