КУЛЬТУР ДА ИСКУССТВО ЭСТРАДЕ

Ече спорт шукыштлан лишыл

Кызыт тӱнямбал кӱкшытыштӧ кугу событий – Пекиныште XXIV теле Олимпиаде. Кум арня жапыште кум тӱжем утла еҥ спортын тӱрлӧ видыштыже вийжым терга.

Марий артист, мурызо да кумдан палыме еҥ-влак олимпиадым эскерат мо? Поснак могай видше дене эртыше таҥасымашлан тургыжланат? Шкешт спорт дене кылым кучат мо?

Родион Алексеев, Марий Эл культурын сулло пашаеҥже:

– Олимпиадыште Российын чапшым аралыше командым чот эскерем, биатлоным, фигурный мунчалтымашым тӱткын ончем. Спортсмен-шамычын сеҥымашышт мыйымат куандара. Йоча пагытыште куштылго атлетике лишыл лийын, Азъял школын сборный командыштыже шотлалтынам. Ече денат район, республик кӱкшытан таҥасымашке ушненам. А кызыт йӧн лийме семын але каныш кечылаште ечыгорныш лекташ келша.

Валерий Петров, мурызо:

– Элнан чапшым аралыше командыште тале, виян спортсмен-влак улыт. Кажне таҥасымашыжымак эскерен шукташ огеш лий, мылам пӧръеҥ-влакын ече дене куржталмышт да хоккей дене модмышт поснак оҥай. Ечызе-шамыч пеш кертыт: шӧртньӧ, ший, бронзо медальыштат улыт. Шарнем, Коркатово школышто тунемме годым ече дене ятыр таҥасымашке ушненам, пӱяште хоккей дене модмат оҥайын эртен. Сеҥыше команде ик банке сокым налын пуэна ыле.

Вадим Краснов, мурызо:

– Олимпиадыште спортын чыла гаяк видше дене таҥасымашым, поснак ече дене куржталше-шамычым, тургыжланен ончем. Изиэм годсек ече спортлан шӱман улам. 1-ше №-ан интернат-школышто тунемме годым кучедалмаш секцийыште капкылым шуаренам, 7 ий кикбоксингыш коштынам.

 

Опубликовать в Одноклассники

Добавить комментарий