Элыштына кумдыклам тӱзатышаш верч всероссийский йӱклымашым эртарымашке волонтер-шамычым погаш тӱҥалыныт.
Российысе чыла регионышто тӱшкан пайдаланыме тӱзатышаш верла-влак верч йӱклымаш «Илыме вер да ола кумдык» нацпроектын «Оласе йырымвелым йӧнаным ыштымаш» федеральный проектше дене келшышын эртаралтеш. Еҥ-влаклан йӱклымашке ушнаш полшаш кумылан волонтер-шамычым регистрироватлаш тӱҥалме нерген «Малая родина – сила России» Всероссийский муниципальный форумышто Кугыжаныш Думын Молодежный политике шотышто комитетшын председательже, Волонтер-влакын рӱдерыштын ассоциацийышт ден ДОБРО.РФ. платформо вуйлатыше Артем Метелев увертарен.
Тӱшкан пайдаланыме тӱзатышаш кумдыкым ойырен налме шотышто йӱклымашке 14 ияш деч кугурак ийготан Российын кеч-могай гражданинже ушнен кертеш.
Тиде йӱклымашым эртарымаште волонтер-шамыч нылымше гана тыршаш тӱҥалыт. Нуно тӱшкан пайдаланыме кумдыклаште, тӱшка мероприятийлаште, икмыняр моло вере пашам ыштат да участник-шамычым ушаш полшат, еҥ-влаклан йӱклымашын кӱлешлыкшым умылтарат.
– Россий Президентын кӱштымашыж дене келшышын оласе йырымвелым йӧнаным ыштыме да тӱзатыме программе илышыш шыҥдаралтеш. Тудлан лийын изирак олалаште парк, сквер, эҥер сер-влак почылтыт, йоча площадке-влак уэмдалтыт. Элна да ола-влак эшеат мотор лийыт, а еҥ-влак тидлан куанен илат. Кушко могай вашталтышым пуртышашым нуно шкешт ойырен налыт. Тидлан йӱклымаш эртаралтеш. Программым Российын Чоҥымаш министерствыже Волонтер-влакын рӱдерыштын ассоциацийыштын полшымыж дене илышыш шыҥдара. Ӱмаште проектыш 100 000 наре доброволец ушнен. Тений нунын чотышт ешаралтеш манын ӱшанем, – каласен Артем Метелев.
Волонтер радамыш Российыште илыше 14 ийым темыше кеч-могай еҥ возалт кертеш. Тидлан ДОБРО.РФ платформышто (Голосование за благоустройство 2024) регистарцийым эртыман. Ойырен налме годым проектыш ушнаш ямде улмым, еҥ-шамыч дене мутланен, нунын кумылыштым савырен, проект нерген раш каласкален да йодыш-влаклан вашештен моштымым, стрессым чытен кертмым шотыш налыт.
Доброволец-влакын пашаштым регионласе волонтер штаб-влак виктараш тӱҥалыт. Нунак еҥ-шамычым ойырен налыт да туныктат. Кажне субъектыште доброволец-влаклан кумылаҥдыше программе темлалтеш.
Волонтер-влакын тыршымышт дене 2023 ийыште Всероссийский йӱклымашке Российыште илыше 14,2 млн. утла еҥ ушнен.
Тений йӱклымаш молгунамсе семынак март-апрельыште лиеш.
«Оласе йырымвелым йӧнаным ыштымаш» федеральный проектым илышыш шыҥдарымаш 2030 ийлан Российыште олаласе кумдык-влакын качествыштым 1,5 пачаш саемдаш полша.
Тиде проектын сайтше тыгай: https://gorodsreda.ru
Л.Камалетдинова
