УВЕР ЙОГЫН

Фестиваль: Марий гармонист-влак чылалан келшеныт

14 гыч 16 сентябрь марте Киров ола воктенысе каныме базыште гармонист-влакын «Вятские-хватские» фестивальышт эртен. 

Тушко Удмуртий, Коми республикла, Калуга, Киров областьла, Пермь кундем, Нижний Новгород, Архангельск, Омск, Екатеринбург, Иваново олала гыч участник-влак погыненыт.

Марий Эл гыч Курыкмарий районын шочшыжо, РФ культурын сулло пашаеҥже, уста гармоньчо Арсений Яйцов, тыгак Шернур тӱвыра пӧртын аккомпаниаторжо, солистше, гармонист Александр Иванов ден  Памашсола тӱвыра пӧртын вуйлатышыже Петр Токтаров миеныт. Арсений икымше степенян лауреат лӱмым налын, а Шернур гармончо-влак  лауреат лӱм дене пӧртылыныт. 

— Фестивальыште лийме кужу жаплан шарнаш кодеш. Тушто ӱжмӧ кугу уна семын «Играй гармонь» проектлан тӱҥалтышым ыштыше Геннадий Заволокинын изажын эргыже, гармонист-виртуоз, Новосибирск гыч Антон Заволокин, лийын, — палдара Саша Иванов. — А тиде фестивальым эртараш – Киров ола гыч композитор Игорь Русскихын шонымашыже. Тудо кодшо ийын Килемарыш «Веселуха» фестивальын ойырен налме туржым эртараш толын ыле. Тушко меат, Шернур тӱвыра пӧртын артистше-влак, миенна да сеҥымаш дене пӧртылынна. Тиддеч вара телым Кировыш кайышаш улам ыле, но тӱрлӧ амал лекте. Сандене ты гана миенак толаш шоненам. Адакшым шкетын огыл, Петр Токтаров дене дуэт дене сценыш лектынна.

Шернур артист-влаклан унаште лияш пеш келшен.

— Пайрем кечылаште эрже-касше эре гармонь йӱк шергылтын. Пиалешна, игечат пеш мотор лийын. Йӱдым кугу тулото йыр иктаж шӱдӧ утла еҥ погыненна. Икте-весе дене палыме лийме, мурымо, гармоньым шоктымо, вет, мыланна, тӱрлӧ кундем гыч чумыргышо-влаклан, чылажат оҥайын чучын. Икманаш, чылажым мут дене каласенат мошташ ок лий, тыгайым шке шинча дене ужаш да коваште дене шижаш кӱлеш.

Фестиваль-конкурсын гала-концертше 11 ноябрьыште Киров олаштак лиеш. Тушто мастарлыкым ончыкташ Игорь Русских Шернур кундем гыч Саша Иванов ден Пётр Токтаровын дуэтшымат ӱжын.

А.Байкова.

(Фотом А.Ивановын, А.Яйцовын альбомышт гыч налме.)

Опубликовать в Одноклассники

Добавить комментарий