22 июньышто Марий Элын чыла районыштыжо Кугу Отчественный сарыште вуйым пыштыше-влакым ойганен шарнымылан пӧлеклалтше мероприятий-влак эртеныт.
Ты кечын Марий Элым вуйлатыше Юрий Зайцев рӱдоласе митингыш ушнен, Воин Чап монумент ден Курымашлык тул ончыко пеледышым пыштен да каласен:
«1941 ий 22 июньышто совет калыкын историйыштыже ик эн шучко да вӱран сар тӱҥалын. Тудо 1418 кече да йӱд шуйнен да тиде жапыште 27 миллион утла еҥын илышыжым лугыч ыштен.
Марий АССР-ыш сарын тӱҥалмыж нерген увер автономийлан 20 ий теммым палемдыме годым толын. Пайрем мероприятий-влак митинглаш савырненыт. Еҥ-влак немыч-фашист агрессор-влаклан пеҥгыде карум пуаш йодыныт. Вес кечынак шӱдӧ да тӱжем дене землякна-влак Шочмо элнам аралаш кӱлмӧ шонымаш дене военкоматла дене шогеныт. Тылысе регион-шамыч предприятий-влакын, республикышкына эвакуироватлен кондымынат, пашаштым шуйымо шотышто кугу ответственностьым ӱмбакышт налыныт. 1941 ий августышто Ленинградысе военно-воздушный академий пашам ышташ тӱҥалын. Сар жапыште тыште Москва, Ленинград, Одесса, Киев, Ржев олала гыч 27 утла предприятий производство пашажым умбакыже шуен».
Регионым вуйлатыше палемден: республикна гыч фронтыш 142 тӱжем еҥ каен, тышеч 75 тӱжемже пӧртылын огыл. Совет Ушемын Геройжо званийым Марий кундемыште шочшо 53 еҥлан пуэныт.
«Фронтовикна-влакым пагален шарнена да тылыште – заводышто, пасушто, предприятийлаште – вийым да тазалыкым чаманыде тыршыше-шамычлан тауштена. Геройна-влакым волгыдын шарнен илаш тӱҥалына», – каласен Юрий Зайцев.
Ты кечын республикна мучко еҥ-шамыч мемориал-влак деке пеледышым пыштеныт, ойганен шарныме кечылан пӧлеклалтше акцийлаш ушненыт да кугезе-влакын подвигыштым шарналтеныт.
Марий Эл вуйлатышын пресс-службыжын уверже негызеш Галина Кожевникова ямдылен
Денис Речкинын фотожо
