Марий Эл вуйлатыше Юрий Зайцев И.С.Палантай лӱмеш тӱвыра да сымыктыш колледжым уэмден олмыктымо деч вара ончен савырнен.
Ты объектыште ачалыме паша кум ий шуйнен.
2022 ийыште оралтын леведышыжым пӱтынек вашталтеныт, а ӱмаште оралтын шола ужашысе кумшо пачашыште олмыктымо пашам мучашленыт. Тушто спортзалым, коридор ден тунемме класслам уэмденыт, тыгак инженер коммуникацийым вашталтеныт. 2025 ийыште зданийын пурла ужашысе кумдыклам да кудывече вел гыч фасадым ачалаш палемдыме.
Ты пашам республикын «2013-2030 ийлан Марий Элын тӱвыраже» кугыжаныш программыж дене келшышын республикын бюджетше гыч ойыралтын. Кум ийыште тидлан 50,1 миллион теҥгем колтеныт.
«Тӱҥжӧ, ончыкылык музыкант, актёр, хореограф, калык да эстраде исполнитель, тыгак тӱвыра аланыште тыршыше моло пашаеҥ-влаклан профессионал семын кушкаш, кумда Российыште республикнан чапшым аралаш йӧнан лийже, – палемден Юрий Зайцев.
Колледж республикыштына тӱвыра да сымыктыш аланыште шуко йыжыҥан тунемме кластерлан шотлалтеш:
– тӱвыра да сымыктыш кок факультет,
– Национальный сымыктыш гимназий,
– йоча сымыктыш школ,
– кок тӱшкагудо,
– креатив индустрий школ.
Колледжыште кызыт 1,4 тӱжем студент тунемеш.
Марий Эл вуйлатышын пресс-службыжын
уверже негызеш Алевтина БАЙКОВА ямдылен