Республикыште 59 студент ден аспирант Марий Элым вуйлатышын стипендийже дене палемдалтын.
Ушештарена, регионым вуйлатышын стипендийже – тунеммаште сеҥымашыш шушо-влаклан полыш кокла гыч иктыже. Выплате кугыт образований кӱкшыт дене кылдалтын: 1600 гыч 3000 теҥге марте.
Стипендиат-влаклан дипломым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ден республикын образований да науко министржын икымше алмаштышыже Андрей Сушенцов кучыктеныт. Палемдалтше 59 студент ден аспирант-влак коклаште 28 еҥже кыдалаш профессионал образованийым пуышо организацийыште тунемеш, 22 ӱдыр-рвезе вузышто шинчымашым пога, 9-же – аспирант-влак.
Константин Иванов палемден: «Образованийыш инвестиций – мемнан республикын ончыкылыкышкыжо инвестиций. Тачысе стипендиат-влак эрласе специалист-шамыч улыт, нуно Марий Элын экономике да социальный сфержым вияҥдаш тӱҥалыт».
Республикын образований да науко министржын икымше алмаштышыже Андрей Сушенцов каласен: «Мемнан студент ден аспирант-влакын сеҥымашышт дене кугешнена. Тиде сеҥымаш шкеныштын тыршымыштын лектышыже да республикыште талантан молодёжьлан полышым пуышо системын результатше».
Г.Кожевникова
Фотом Марий Эл Образований да науко министерствын соцкылысе лаштыкше гыч налме.
