Кодшо шуматкечын Советский районысо Шуарсола стадион гӱжлен.
Тушто ты кундем гыч СВО-што вуйым пыштыше сарзе-влакым шарнымылан пӧлеклалтше футбол таҥасымаш кокымшо гана эртен. Советский, Медведево районла, Йошкар-Ола гыч 10 команде ушнен.
Тыгай спорт мероприятийым икымше гана эртараш Шуарсола ялын шочшыжо Денис Гаврилов кодшо ийын темлен. Темлен веле огыл, шкежак йолташыже-влакым, ял калыкым тарватен. Тудо изинек спортлан кумылан лийын, футболла, волейбола модын, кучедалме тӱрлӧ вид дене шке капкылжым шуарен. Ежово селасе, Йошкар-Оласе строительный техникумын футбол командыштланат модын. Ешыж дене Йошкар-Олаште ила гынат, Шуарсола командын чолга еҥже. Пырля тӱрлӧ таҥасымашке кудалыштыт, шкенышт денат эртарат.
Денис стадионышто волейбол площадкым келыштараш шона. А тидлан ошма кӱлеш. Верысе администрацийышкат темлымаш дене лектын, но кызытеш полыш уке манын палемдыш шкеже. Тыгай ура чонан еҥ ойлымыжым садак шукта, шонем.
Тенийысе футбол таҥасымашым тудак организоватлен. Тудлан Степан Андреев, Владимир Мусанов полшеныт. Ял калык дене оксам погеныт. Мероприятийлан школ стадионым тыгак тӱшкан эрыктен шынденыт. Таҥасымаш деч вара пырля шокшо кочкышым авызлышашлан йӧрварымат ончылгоч ямдыленыт. Туштак кол шӱрым шолтеныт, пловым ыштеныт.
Шуарсола кундемыште тачысе кечылан СВО-што ныл еҥ служитла. Ныл еҥын ӱмыржӧ тушто кӱрылтын: Геннадий Актанаев, Артём Васильев, Сергей Армяков да Руслан Павлов улыт. Денис Владимирович шкежат военный, санденжат вуйым пыштыше ялысе рвезе-влак лӱмеш таҥасымашым эртараш кумылаҥын. Тудым почмашке лишыл еҥыштым ӱжыныт.
Футбол таҥасымаште икымше верым Йошкар-Ола гыч «Аякс» команде сеҥен налын. Кокымшо ден кумшо верыш Шуарсола гыч «Шуарка» да Кельмаксола гыч «Родина» команде-влак лектыныт.
Таҥасымаш оҥайын, кумылын эртен. Ял калык шукын погынен. А тыгай мероприятий пошкудо-шамычлан лишкырак лияш, икте-весе коклаште кылым пеҥгыдемдаш полша. Теве шукерте огыл тӱвыра пӧртым олмыктымат – сай ошкыл. Самырык-влаклан дискотекымат эртараш тӱҥалыныт, маньыч верысе-шамыч.
Светлана Носова
Снимкыште: СВО-што вуйым пыштыше салтак-влакын лишыл еҥыш.
Денис Гавриловын фотожо.
