«Тӱвыра пӧрт уло гын, ял ила да тӱзлана», – манеш Удмурт Республик Белезинский район Сергино селаште шочын-кушшо самырык ӱдыр Ирина Халтурина. Тудо икымше класс гычак верысе тӱвыра пӧртышкӧ усталыкшым вияҥдаш коштын. Школым тунем пытарымеке, икмыняр жап гыч тушкак пашам ышташ пурен.
– Ирина, ялысе клуб таче кузе ила?
– Пашана «шолеш». Ме илыш дене тӧр ошкылаш тыршена, садлан кажне мероприятийнам ойыртемалтшын, кызытсе жаплан келшышын эртарена. Коллективнан пашажым районыштат кӱкшын аклат: кажне гаяк пайремыш ушнаш ӱжыт. Концертнам пошкудо яллаштат уло кумылын вучат. Селасе усталык кудышкынат уна-влак эреак вашкат.
Калыкын тӱвыражым палымаште, родо-тукымын йӱлажым арален илымаште ялысе клубын надырже кугу. Лач икте ойгандара: самырык-влак шагалын улыт. Коллектив ден кружок-влакым вияҥден колташ, нунылан у шӱлышым пурташ нелырак.
– Шукерте огыл тӱвыра аланыште тыршыше-влакын пайремышт эртен кайыш. Тыйын шонымаште ты профессий дене илышым кылдыше еҥ могай лийшаш?
– Ты пашаште усталык, чолгалык, пашам йӧратымаш ончыл верыште улыт. Тыгак кугу чытыш деч поснат огеш лий.
Мый тӱвыра пӧртым ик тичмаш организм дене таҥастарем. Кунам тушто кажне пашаеҥ ваш умылен, полшен, икте-весылан эҥертен пашам ышта, тунам тудо таза лиеш. А яллан клуб кӱлешак. Калык тушко пайремым пайремлаш, каналташ, мутым вашталташ ожнысекак коштын. Кызыт шуэнрак гынат, садак толын кая. Вет тӱвыра пӧрт уло гын, ял умбакыжат илаш да тӱзланаш тӱҥалеш.
– Ирина, ме тый денет «IВолга» Юл кундем федерал округысо форумышто палыме лийынна. Ты погынымаш могай шонымашым шочыктен?
– Ты мероприятийым ик эн шергакан да шарнымашеш кодшылан шотлем. Самырык-влак Россий, тӱнямбал кӱкшытан мероприятийыш кеч ик гана да миен толшаш улыт. Вет тыгай вашлиймаш-влак шуко уым пален налаш, у йолташым вашлияш, кумдан палыме еҥым ужаш йӧным ыштат. Тыге шинчаончалтышат вашталтеш, ончыкыжым тыршаш кумыл лектеш.
– Мый палем, шукерте огыл режиссёр-постановщик специальностьым налынат …
– Тыге. Удмурт тӱвыра колледжым тунем пытарымемлан идалык веле эртен. 8-ше класс гычак ты тунемме тӧнежыште шинчымашым погаш шоненам. 11 класс деч вара хореографлан пуренам ыле. Тӱрлӧ амаллан кӧра жаплан шуэн каяш логале, но шонымашем деч кораҥын омыл. Режиссёр-постановщиклан курсым погымо нерген пален налмеке, йодмашым вигак колтенам. Мылам тунемаш моткоч келшен. Вет режиссёр иканаште куштызат, актёрат, сӱретчат лийшаш.
– Яра жапет кузе эртарет?
–Пелашем дене кок икшывым ончен-куштена. Кызыт йоча дене шинчем гынат, йӧратыме паша верышкем миен коштам. Концертлашкат чулымын ушнем.
– Лудшо-влаклан могай тыланымашет лиеш?
– Ваш йӧратыза, пагалыза. Тӱвырадам, йӱладам аралыза. Таза лийза.
– Ирина, ончыкылык корнет волгыдо лийже.
– Тау!
О.МОШКИНА мутланен
