МАРИЙ ЙӰЛА

Тӱҥ онаеҥ А.И.Таныгинын У ий пайрем дене саламлыме мутшо.

О, порын, кумылнам волгалтын, нӧлтен шого, Ош ТӱҥСандалык юмына!

У ий пайремет дене, ужар шаган кожет дене, тичмаш кинде-шинчалет дене. Эртен кодшо идалыклан тынысым, шулыкым, серлагышым пуыметлан марий калык лӱм дене вуйнам савена. Сандалык юмына, У идалыкым у пиалан илыш дене чапландарен шого.

О, порын, сай пӱрымаш дене, поро аралтыш серлагыш дене, кумылан каҥаш дене толын шогыза, Пӱрышына, Кугу Серлагыш. Марий калыкын илыме аҥажым поро пӱрымаш дене арален шогыза кугу мардеж деч, кугу вӱд деч, кугу тул деч, йот коштанын осал шинчаж деч, калык кокласе лавыран шомак деч.

О, порын, толын, йӧратен шого, Мер кугу юмына. Йӱла ден йӱла кучымаште, тӱс ден тӱс кучымаште, эл ден эл кучымаште поро каҥашым пуэн шого.

Иза-шольо, ака-шужар, тулар-тулаче-влак! Еш кышкарда тичмашын тӱланен шогыжо. Сурт-печыда нӧлталтын, уэмдалт шогыжо. Вольык йӱк-йӱанлан куанен шогыза. Кинде-шинчалда ӱстембал тич пургыжалт шогыжо. Мӱкш отарда шем пыл гай нӧлталт шогыжо, мӱй клатда саска пуш дене ӱпшалт шогыжо.

У ий дене! У вий дене эсен, тазан илыза!

Опубликовать в Одноклассники

Добавить комментарий