«Марий Эл» газетлан – 110 ий
Поро паша кужу ӱмыран
Шкешт каеныт гын, возымышт кодын
Тӱвырген толжо
Марий газет-влак деке мый изинекак шӱмаҥынам. «Марий ял» ден «Йошкар кече» эреак толын шогеныт, нуным шкенан ялыште шаркаленам. Пӧлек шотеш кум ий почела нуным яра налынам. Тунамак тыгыде заметкылам нине изданий лекме Москваш, Йошкар-Олаш колтылынам. Тыге редакцийла дене келшымаш кыл шочын, тылеч вара нигунамат кӱрылтын огыл.
1933 ийыште Кожлаер ШКМ-ым тунем лектым. Умбакыже тунемаш йӧн ыш лий. Садыге декабрь мучаште «Ямде лий» газет редакцийыш паша ышташ пурышым. Литпашаеҥат, корректорат лиялтын.
Редакций паша куштылго огыл. Тунам самырык-влаклан, тидын шотыштак мыланемат, уло кумылын «Ямде лийын» редакторжо З.Е.Яковлева, поэт Олык Ипай, «Рвезе коммунистын» редакторжо А.З.Речкин полшеныт. Кызыт нуно уке улыт гынат, мый кажне гана кугурак йолташ-влакем шӱм вургыж шарналтем, вет нуно марий печатьым вияҥдымаште шуко суапле пашам ыштеныт.
Мый шижынам: шинчымаш ок сите. Тыге йолташ-влакын каҥашышт почеш ончыч Марпединститут пеленысе курсыш пурышым, вараракше учительский институтышто тунемым. Тылеч вара – армий, фронт, госпиталь. Но тунамат печать дене кыл кӱрылтын огыл.
1950-1955 ийлаште ме Василий Чалай дене пырля Москваште, М.Горький лӱмеш Литературный институтышто, тунемна. Йошкар-Олаш пӧртылмек, тӱрлӧ вере пашам ыштенам. Но чон адакат редакцийыш ӱжын. Тольым «Марий коммуныш». Поро кумылан редактор П.Г.Корнилов пашаеҥ-влаклан кугун полшен, автор-влак денат лыжган кутырен моштен. Посна тӧрсырым палемдымек, ончыкылык пашалан таратен. Кызытсе редактор-влаклан тиде чапле традицийым умбаке шуйыман.
Йодмыда почеш 1934 да 1978 ийласе фотолам колтем. Самырык годсо фотосӱретым мый шкеат ӧрын ончем: тыгай «паҥга» газет пашаеҥ лийын. Руш манмыла, «чудеса да и только!»
«Марий коммуна» мыйым куандара, коллективын тыршымыжлан кӧра тудо эре саем, сӧралешт толеш. Автор-влакым газет йыр утларак чумырыман, нунылан кушкашышт тӱрлӧ семынат полшыман. Тунам газетын шулдыржо утларак пеҥгыдемеш, лӱмнерже кумданрак шарла.
Редакций паша дене пырля творчестват мондалтын огыл. Тидлан мыланем Трудовой Йошкар Знамя, «Знак Почёта» орден-влакым, «За трудовую доблесть» медальым пуэныт.
«Марий коммуна» коллективлан мый уло чон дене у сеҥымашым тыланем. Пашада ушнен, тӱвырген толжо.
Миклай КАЗАКОВ,
«Марий коммуна» газетыште 1963-1970 ийлаште тӱвыра отделым вуйлатыше,
Марий АССР-ын калык поэтше.
1986 ий 26 март.
Изи Миклай. 1934 ий. Миклай Казаков. 1978 ий.
Авторын архивше гыч фото.
Лӱмгече лаштыклам Юрий ИСАКОВ ямдылен.
