Марий Эл Тазалык аралтыш министерствын увертарымыж почеш, регионыштына у коронавирус инфекций дене кылдалтше сÿрет саемеш. 7 февральыште республикысе поликлиникылаште 9147 пациентым, мöҥгыштö 1671 черлым обслуживатлыме гын, 14 февральыште амбулаторий да поликлинике звено 1633 пациентын тазалыкшым терген, 782 еҥ деке мöҥгышкыжö лектын коштын.
15 февральыште республикысе кандаш инфекционный стационарыште у коронавирус инфекций дене черланыше пациент-влаклан медицине полышым пуымо 1075 койко лийын, тудын 72 процент ужашыжым черле-влак айленыт. Тиде кечын больницыла гыч 68 еҥым мöҥгышкö колтымо гын, 76 черлым эмлалташ пыштыме. Стационарлаште 771 пациент медицине полышым налын, ты чот гыч 93 черле неле состоянийыште лийын, 14 еҥ шодым искусственно вентилироватлыме йöн дене шÿлен, 322 гражданлан кислород полыш кÿлын.
Черле йоча-влакынат чотышт иземеш. 15 февральыште регионысо поликлиникылашке 320 йоча медицине полышым йодын толын, 122 икшывын тазалыкшым мöҥгыштö тергыме. Республиканский йоча клинический больницыште 31 ÿдыр-рвезе эмлалтын.
– У коронавирус инфекций дене черланыше-влакын чотышт иземеш гынат, омикрон-штамм дене инфицироватлалтше-шамыч содыки эше шукын улыт, – манеш республикын тазалык аралтыш министржын алмаштышыже Татьяна Бастракова. – Тидымак шотыш налын, калыкым, поснак илалше ден хронический черан еҥ, мÿшкыран ÿдырамаш-шамычым, вирус ваштареш виктаралтше йодмаш-влакым шукташ, маскым чияш, кидым обработатлаш, шуко еҥ улман верым лийме семын кораҥын кошташ ÿжам.
М.ИВАНОВА
