Шошо шумо дене еҥ-влак велосипед дене утларак кудалышташ тӱҥалыныт. А кеҥежым нунын радамышт ешеат ешаралтеш. Но осал шонымашан еҥ-шамычат шагалын огытыл. Нуно еҥын погыжым кузерак шолыштшаш ыле манын, эскерен да ваҥенак гына коштыт – шижтарат полиций пашаеҥ-влак. Мутлан, кодшо кечылаште гына икмынярын йолорвашт деч посна кодыныт.
Иктыже – Звенигово ола гыч 33 ияш ӱдырамаш. Тудо велосипедшым илыме пӧртшын кокымшо пачашысе тошкалтыш площадкыште коден улмаш. Уголовный розыск пашаеҥ-влак тудым кӧн шолыштмыжым рашемденыт. Тиде Звенигово олаштак илыше ончыч судитлалтше 28 ияш пӧръеҥ лийын. Тудо ты пӧртышкак йолташыж деке толын улмаш. Мӧҥгышкыжӧ каяш тарванымекше, подъезд гыч лекмыж годым велосипедым ужылалтен. Тудыжым тросан сравоч дене нигушкат пижыктыме огыл улмаш. Пӧръеҥ тидын дене пайдаланен да велосипедым уремыш шӱдырен луктын, вара мӧҥгышкыжӧ ласкан гына кудалын. Но кучалтын.
Велосипедым ынышт шолышт манын, полиций пашаеҥ-влак теве мом ышташ темлат:
· погым тыглай гына шогалтен кодыман огыл, тудым эскерыман. Подъездлам петырымат шукыж годым огеш полшо;
· противоугонный манме замок ден кӱртньӧ тросат огыт утаре, молан манаш гын нуным посна инструмент дене куштылгын пӱчкаш лиеш;
· велосипедым ынышт шолышт манын, уремыште видеокамер уло гын, тушко койшын шогалташ тыршыман;
· шке влосипедын «ойыртемалтше палыже-влакым» шарнен кодман. Тыгайже уке гын, ӱштын колташ лийдыме чия дене иктаж-мом возыман. Мутлан, почто индексым але пӧрт номерым. Шолышташ тарваныше-шамыч тыгай «меченый» манме велосипедым солалташ пешыже кумылан огытыл. Молан манаш гын нуным пеш вашке муын кертыт;
· кажне велосипедын шкенжын серий номерже уло. Тудо утларакше рамыште возалтеш. Сандене тудым возен налман да аралыман;
· тыгак, тудым возен налын, велосипедын паспортышкыжо сералтыман;
· велосипедым налме годым пуымо документым аралыман. Тӱрлӧ амаллан кӧра тудыжо уке гын, серий номержым фотографироватлыман;
· велосипедым тӱрлӧ велымат фотографироватлаш уто огыл. Тудым шолыштыт гын, тылеч вара муаш, тыгак тиде тендан погыдак манын, доказатлаш куштылгырак лиеш.
Велосипедым шолыштыныт гын, теве мом ыштыман:
· тидын нерген вигак полицийыш 02 (мобильный телефон гыч 020) номер дене йыҥгыртен увертарыман;
· полицийыш йодмашым возымо годым велосипедлан документ, тудын фотографийже але могай улмыж нерген радамын палдарымаш лиеш гын, сайрак.
Л.КАМАЛЕТДИНОВА
