13 да 14 сентябрьыште Марий Элыште 7 вере сайлымаш эртен.
Кум вере: Волжский, У Торъял да Шернур районлаште – тӱҥ, 2 вере: Волжск олаште да Руэм посёлкышто – уэш эртарыме да 2 вере: Йошкар-Олаште да Кужэҥер поселкышто – ешартыш сайлымаш-влак лийыныт.
Йошкар-Олаште ешартыш сайлымаште «Единый Россий» партий деч кандидат Евгений Кузьмин сеҥен. Тудын верч 72,36 % избиратель йӱклен.
Волжск олаште уэш эртарыме сайлымаште самовыдвиженец Ксения Снегуровалан 56 % еҥ шке йӱкшым пуэн.
Кужэҥерыште ешартыш сайлымаште «Единый Россий» партий деч кандидат-влак Евгений Прокопьев (35,59 %) ден Олег Сидоркин (22,86 %) сеҥеныт.
Руэмыште уэш эртарыме сайлымаште «Единый Россий» партий деч кандидат Марина Даниарова эн шуко (53,22 %) йӱкым поген.
Шернур муниципал округышто 17 депутат, Волжский муниципал округышто 16 депутат, У Торъял муниципиал округышто 16 депутат сеҥеныт.
Палдареныт
Шочмын эрдене журналист-влаклан эртаралтше пресс-подходышто Марий Эл Сайлымаш комиссийын председательже Ирина Татаринова палдарыш:
– 13 да 14 сентябрьыште эртыше сайлымашыш 36,87 процент калык миен. Эн кугу чолгалыкым Шернур районышто илыше-влак ончыктеныт. Тушто 53,68 процент калык (8958 еҥ) йӱклаш миен. Йошкар-Олаште сайлымашыш 15,84 процент (977 еҥ) толын.
Йӱклаш чылаже 21 тӱжемат 713 еҥ миен. Поснак кугу чолгалыкым самырык избиратель-шамыч ончыктеныт.
– Но нуно веле огыл. Мутлан, Волжский районышто ик участкыште 100 ияш Екатерина Алексеевна йӱклаш миен.
Сайлымаш комиссийын еҥже-влак чыла гаяк участковый избирательный комиссийлаште лийыныт, кӱлшӧ тӱрлӧ сынан полышым пуэныт. Марий Эл Избиркомыш ик вуйшиймаш гына пурен. Но тудыжымат амалже укелан шотлымо. Кажне участковый избирательный комиссийыште видеонаблюдений камер-влак вераҥдыме лийыныт. УИК-лаште чылаже 268 эскерыше пашам ыштен. Тышеч 80-жо – Волжский районышто. 13 да 14 сентябрьыште сайлымаш ласкан эртен.
Тылеч вара Мер эскерымаш штаб вуйлатыше Евгений Кузнецов тыге палдарыш:
– Сайлымаш деч ончыч ме Россий Федерацийын Мер палатыжын методикыже почеш 140 наре эскерышым туныктенна. Кок кече жапыште нуно чыла участковый избирательный комиссийлаште пашам ыштеныт. Эскерыше-влак нимогай ситыдымашымат муын огытыл. Сайлымаш закон дене келшышын эртен.
Журналист-влак деке пресс-подходыш тыгак кок партийын еҥышт толыныт ыле. Иктыже – «Новые люди» партийын советшын еҥже Кирилл Клёвин. Тудо ойлыш:
– Сайлымашын показательже – мыланна моткоч кугу показатель, вет ме эн самырык партий улына. Да тений республикысе районлаште мемнан партий деч кок депутат лиеш. Партийналан тиде – сай паша лектыш.
Весыже – «Единый Россий» партийын исполнительный комитетшын вуйлатышыжын икымше алмаштышыже Матвей Галяутдинов ыле. Тудо кӱчыкын тыге палемдыш:
– 54 мандат гыч 41 мандатше – «Единый Россий» партийын. Тидыже 76 процент наре лиеш да республикыште илыше-влакын партийлан кугу ӱшанже нерген ойла.
Кӧн мыняр мандатше?
Могай партийын мыняр мандатым налмыж нерген ойлаш гын, тудо тыге шеледалтын:
«Единый Россий» – 41
КПРФ – 5
Самовыдвиженец-влак – 4
ЛДПР – 2
«Новые люди» – 2.
«Чолга команде»
Эртыше сайлымаш нерген шке телеграм-каналыштыже Марий Эл вуйлатыше Юрий Зайцев тыге палемден:
– Йӱклымӧ Единый кече мучашлалтын. Республикнан илышыштыже тиде моткочак кӱлешан событий. Кӧ жапым муын да избирательный участкыш толын, мый чылаштлан тауштем.
Депутат-влакын уэмдыме радамышт – тиде чолга команде. Тушто специальный военный операцийын участникше-влакат улыт. Нуно чыланат республик верч тыршаш, калыкын интересшым аралаш ямде улыт.
Депутат-влак еҥ-влаклан мо кӱлмым сайын умылат, вет тӱҥ задаче – республикыште илыше-влак дене эреак вашкылыште лийман, нунын тургыжландарыше йодышыштым писын рашемдыман.
Иктешленыт
Россий президентын Юл кундем федеральный округышто полномочный представительже Игорь Комаров ПФО регионлаште сайлымаш кампаний-влакым иктешлыме совещанийым эртарен.
Тушто аппаратын вуйлатышыже ден округысо регион-влакын тӱҥ федеральный инспекторышт лийыныт.
Игорь Комаровын ойлымыж почеш, ПФО-што тӱрлӧ кӱкшытан 2 тӱжем наре сайлымаш кампаний эртен. Южо регионышто муниципал сайлымаш-влак лийыныт. Еҥ-влак 11 тӱжем избирательный участкылаште йӱкленыт. Сайлымашке 6 миллион утла еҥ ушнен. Округышто кокла шот дене тиде чот 48 процентыш шуын.
Совещанийын участникше-влак йӱклымаш ситыдымаш ден нарушений-влак деч посна эртымым палемденыт.
Любовь Камалетдинова.
Авторын фотожо.
