Полан чыла вере кушкеш. Тудын дене тӱрлӧ кочкыш-йӱышым веле огыл, эмымат ямдылат. Кушкылын саскажат, пеледышыжат, вондыжат, шӱмжат пайдале улыт. Ме кичкыж нерген каласкалена.
Опытан сад-пакчазе-влак поланым икымше йӱштӧ деч вара погат, вет тунам тудо тамле да шере лиеш.
Тиде саска иммунитетым пеҥгыдемда, шӱм-вӱргорно системым тазаҥда, организмым витамин дене пойдара, нервым лыпландара, давленийым волта, вӱр йогымым чара, кылмен черланымым эмла.
Поланым, туржын, чайыш пышташ лиеш. Тудым тыгак телылан кылмыкташ, а вара свежа семын кучылташ келшен толеш. А эше, мясорубкеш пӱтырен, сакырложаш але мӱй дене вараш да холодильникыште аралаш лиеш. Тыгай вартышым кече еда 2-3 изи совла дене кочкаш пайдале.
Организмым пеҥгыдемдаш кӱлмӧ годым 100 г поланым, 1 лимоным шӱмжыге, 200 г кояшудо лышташым, 200 г эрыктыме кӱгыпӱкшым мясорубкеш пӱтырыман, тышкак 200 г шӱшмӱй ден 200 г мӱйым ешарыман. Чыла тидым сайын варыман да холодильникыш шындыман.
Ямде средствым кечеш 2-3 гана 1 кугу совла дене шуженеш (кочмо деч пел шагат ончыч) кочман.
А эше пурам ямдылаш лиеш. Тидланже 1 стакан саскам икмыняр пачаш осылымо марльыш пыштыман, тышкак нелытлан кӱм ешарыман да, мешак семын кылден, нӧлталаш кылым ыштыман. Поланым вӱрж дене шӱткалыме 0,5 л пурыман пластик атышкат пышташ келшен толеш, тыгеже пурашке марле пуш огеш лек.
3 л пурыман янда банкыш 3 л торыквӱдым темыман, 1 стакан сакырложашым, 1 изи совла ӱмбалым ешарыман да сайын лугыман, вара поланан мешакым але пластик атым чыкыман, аҥым 2-3 пачаш осылымо марле дене кылдыман. Банкым пӧлемысе температуран верыште 5-10 кече кучыман. Ӱмбачын ош лончым кораҥден, пурам кажне кечын пу совла дене лугыман. Лийын шушо напиткым холодильникыш шындыман.
Пайдале пурам кечеш 2-3 гана 0,5 стакан дене шуженеш (кочмо деч 20-30 минут ончыч) изишак ырыктен йӱман. Организмым тазаҥдаш ик ате пура огеш сите, сандене кокымшым, кумшым шындыман.
Темлыме йӧн дене ик-кок тылзе эмлалтман.
Шотыш налза: гипотоний, пагарын кугу шопылыкшо, тромбофлебит, подагре да вергыште, шондыгалташте, шондыгорнышто кӱ погынымо годым поланым кочкаш огеш лий.
Маргарита ИВАНОВА ямдылен
М.Иванован фотожо/ «Марий Эл увер агентстве
ТЕМЛЫМЕ ЙӦН ДЕНЕ ПАЙДАЛАНЫМЕ ДЕЧ ОНЧЫЧ ВРАЧ ДЕНЕ КАҤАШЫЗА!
