Марий Элыште тоштер пашаеҥ-влакын профессионал мастарлык конкурсышт иктешлалтын. Тушто ойыртемалтше-влакым эртыше кечылаште Т.Евсеев лӱмеш национальный тоштерыште палемденыт.
Церемоний Тоштер-влакын тӱнямбал кечыштлан пӧлеклалтше мероприятий годым эртен. Саламлыме шомакым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ойлен. Тудо регионысо тоштер пашан вияҥмыжым палемден. А тидлан кугу полышым национальный проект-влак ыштат.
Конкурс икмыняр номинаций дене эртен. Мутлан, «Идалыкын ончер кураторжо» Т.Евсеев лӱмеш национальный тоштер гыч шанче- просветительский пӧлка вуйлатыше Мария Гордеева лийын. Юринысе Шереметьев замокын директоржо Дмитрий Немцев «Тоштер корнывож» номинацийыште ойыртемалтын. Тудын палемдымыж почеш, 1 июльышто замокышто у экспозицийым почыт.
Номинаций-влак ятыр лийыныт. Сеҥыше-влак кокла гыч кажныже шке пашаштым лийжак манын шукта. А тӱҥ задачышт – калыкнан тӱвыра да историй поянлыкшым аралаш да шымлаш, чумырымо материал дене утларак еҥым, поснак самырык-влакым палдараш. Шукышт ты пашам ятыр ий дене шуктат. Нунын коклаште Морко районысо Н.И.Казаков лӱмеш сылнымут-краеведений тоштер вуйлатыше Галина Сошина. Тудым «Профессийлан ӱшанле» улмылан диплом дене палемденыт. Марий кугыжаныш университет деч вара кумло ий лишке ты аланым куралеш. Тыгаяк дпиломым Волжский район Карай кыдалаш школын историй да обществознаний туныктышыжо, Совет Ушем Герой З.Ф.Прохоров да Россий Герой В.В. Иванов лӱмеш боевой чап тоштер вуйлатыше Алевтина Гордеевалан кучыктеныт. Морко районысо тоштерым вуйлатыше Марина Александровамат тоштер пашан ветеранже манаш лиеш. Тудо «Идалыкын ончер кураторжо» номинацийыште кокымшо верым сеҥен.
Светлана Носова
Снимкыште: Галина Сошина ден Марина Александрова.
Авторын фотожо.
