Марий Элын Пӱртӱс поянлык, экологий да йырым-йырысе средам аралыме шотышто министерствыжын шанче-технический советшын шуэн вашлиялтше да йомын толшо кушкыл ден янлыкым шукемден толмо шотышто межведомственный комиссийжын заседанийже эртен. Тушто республикын бюджетше кӱшеш шуктымо пашам иктешленыт.
А пашажым Юл кундем технологий кугыжаныш университетын Ботанический садше ден Марий кугыжаныш университет шуктеныт. Эколог-влак Марий Элын «Йошкар книгашкыже» пуртымо шуэн вашлиялтше кушкыл ден янлык-влакым арален кодымо дене кылдалтше мероприятий-влакым Медведево, Звенигово, Волжский районлаште эртареныт.
Тачысе кечылан шуэн вашлиялтше кушкыл-влакын йомын толмышт поснак тургыжландара. Йодышым шотыш кондаш манын, нуным верлаш лектын, угыч шындат. Тыгай паша республикыште 2010 ий гыч эртаралтеш. Мутлан, Ботанический садын пашаеҥже-влак шындышашлык материалым шке ончен куштат.
Кодшо ийын республикын «Йошкар книгашкыже» пуртымо йомын толшо кушкыл ден янлык-влакым шымлыме пашат вораҥын. Мутлан, янлыкым налаш гын, тыгайже кундемыште 125 тӱрлӧ ила. Тыгак эше 33 тыгай янлык улмым рашемдыме. Нунымат «Йошкар книгаш» пуртат. Шуктымо паша лектыш почеш чумырымо материалым Марий Элын у «Йошкар книгажым» ямдылыме годым кучылтыт.
Светлана Носова
Снимкыште: шуэн вашлиялтше кушкыл-влакын росоташт
Фотом министерствын воткыл лаштыкше гыч налме
